ওদালগুৰি ভ্ৰমণ কৰি দলীয় কৰ্মীক সাক্ষাৎ কৰিলে বিজেপিৰ ৰাষ্ট্ৰীয় সাধাৰণ সম্পাদক ভি সতীশে

ওদালগুৰি জিলাত তৃণমূল পৰ্যায়ৰ পৰা আৰম্ভ কৰি দলীয় কাম কাজৰ পৰ্যালোচনা কৰিবলৈ ভাৰতীয় জনতা পাৰ্টিৰ এখন গুৰুত্বপূৰ্ণ সাংগঠনিক সভা বুধবাৰে ওদালগুৰি নগৰ সমিতিৰ কনফাৰেন্স হলত অনুষ্ঠিত হয়।

বিজেপিৰ এই সভাতত দলৰ ওদালগুৰি জিলা সমিতিৰ অধীনৰ আঠটা মণ্ডল সমিতিৰ দলীয় কৰ্মীসকল উপস্থিত থাকে।

দলৰ ৰাষ্ট্ৰীয় সাধাৰণ সম্পাদক (সাংগঠনিক) ভি সতীশে বৈঠকত অংশগ্ৰহণ কৰে। তেওঁ জিলাখনৰ দলীয় কৰ্মীসকলক দলটোক শক্তিশালী কৰি তোলাৰ লগতে অঞ্চলটোৰ বাবে ভৱিষ্যৎ লক্ষ্যত উপনীত হোৱাৰ ক্ষেত্ৰত ঐক্যবদ্ধভাৱে কাম কৰিবলৈ আহ্বান জনায়।

বিজেপিৰ ৰাষ্ট্ৰীয় নেতাগৰাকীয়ে লগতে উত্তৰ-পূৰ্বাঞ্চলৰ ৰাজ্যকেইখনত বিজেপিৰ বৰ্তমান সাংগঠিনক কাৰ্যকলাপ সম্পৰ্কে উল্লেখ কৰি দলীয় কৰ্মীসকলৰ উৎসাহত সন্তুষ্টি প্ৰকাশ কৰে।

সভাখনৰ আঁত ধৰে বিজেপিৰ ওদালগুৰি জিলা সমিতিৰ সাধাৰণ সম্পাদক অজয় হাজৰিকাই।

উক্ত সভাত বক্তৱ্য ৰাখে বিজেপিৰ ৰাজ্যিক সাধাৰণ সম্পাদক দিলীপ শইকীয়া আৰু মৃগাংক বৰ্মন আৰু ৰাজ্যিক সমিতিৰ সাধাৰণ সম্পাদক (সাংগঠনিক) ফনীন্দ্ৰ নাথ শৰ্মাই।

সভাখনত অন্যান্য সকলৰ লগতে উপস্থিত আছিল অসম পৰ্যটন নিগমৰ উপাধ্যক্ষ নৱদ্বীপ কলিতা, অসম বিত্তীয় উন্নয়ন নিগমৰ উপাধ্যক্ষ অনিল দাস, ৰঙিয়া বিধানসভা সমষ্টিৰ বিধায়ক ভৱেশ কলিতা আৰু বিজেপিৰ ওদালগুৰি জিলা সমিতিৰ সভাপতি কাৰ্তিক চন্দ্ৰ বড়ো।