কমনৱেলথ গেমছত সোণালী ইতিহাস ৰচা মণিপুৰৰ ভাৰোত্তোলক মীৰাবাই চানুক অভিনন্দন মুখ্য মন্ত্ৰী বীৰেন সিঙৰ
অষ্টেলিয়াৰ গল্ডক’ষ্টত অনুষ্ঠিত কমনৱেলথ গেমছ ২০১৮ত মণিপুৰৰ ভাৰত্তোলক ছাইখম মীৰাবাই চানুৱে ৪৮ কেজি শাখাত অভিলেখ ভংগ কৰি দেশৰ হৈ প্ৰথমটো স্বৰ্ণ জয় কৰিবলৈ সক্ষম হোৱাত মণিপুৰৰ মুখ্য মন্ত্ৰী এন বীৰেন সিঙে খেলুৱৈগৰাকীক শুভেচ্ছা প্ৰদান কৰে।
উল্লেখ্য যে চানুৱে প্ৰতিযোগিতাখনত নিজৰ ১৯৪ কেজি উত্তোলনৰ অভিলেখ ভংগ কৰাৰ উপৰি প্ৰতিযোগিতাখনৰ পূৰ্বৰ অভিলেখ ১৭৫ কেজিৰো অভিলেখ ভংগ কৰি ১৯৬ কেজি ভাৰোত্তোলনেৰে দেশৰ হৈ প্ৰথমটো স্বৰ্ণপদক অৰ্জন কৰিবলৈ সক্ষম হৈছিল।
মুখ্য মন্ত্ৰীয়ে শুভেচ্ছা বাৰ্তাত কয় যে বিশ্ববিজয়ী ভাৰোত্তোলকগৰাকীয়ে এনেদৰে ভৱিষ্যতেও যাতে উজ্জ্বীৱিত প্ৰদৰ্শন দাঙি ধৰি মণিপুৰ তথা দেশৰ হৈ গৌৰৱ কঢ়িয়াই আনিবলৈ সক্ষম হয় তাৰ বাবে কামনা কৰিলো।
আনহাতে মণিপুৰৰ নিৰ্মাণ মন্ত্ৰী টিএইচ বিশ্বজিতে ভাৰোত্তোলকগৰাকীৰ সাফল্যত কয়, ‘মীৰাবাইৰ এই সাফল্যই মণিপুৰৰ ক্ৰীড়া জগতলৈ এক আশাৰ সঞ্চাৰ কঢ়িয়াই আনিব। কিয়নো তেওঁৰ পৰা অনুপ্ৰাণিত হৈ ৰাজ্যখনৰ আন মহিলাসকলো ক্ৰীড়া জগতলৈ আগ্ৰহী হ’ব’।
ইয়াৰ উপৰি ৰাজ্যৰ ক্ৰীড়া মন্ত্ৰী লেটপাও হাওকিঅ’য়েও ছানুক শুভেচ্ছা প্ৰদান কৰি কয়, ‘মীৰাবাই ছানুৱে কেবল ভাৰত বা মণিপুৰলৈ গৌৰৱ কঢ়িয়াই অনা নহয় তেওঁ সমগ্ৰ কমনৱেল্থ গেমছ প্ৰতিযোগিতাখনলৈও গৌৰৱ কঢ়িয়াই আনিছে’।
৪৮ কেজি শাখাত অভিলেখ ভংগ কৰি দেশৰ হৈ প্ৰথমটো স্বৰ্ণ জয় কৰিবলৈ সক্ষম হোৱা মণিপুৰৰ ভাৰোত্তোলক ছাইখম মীৰাবাই চানুক ৰাজ্যখনৰ সমাজ কল্যাণ মন্ত্ৰী নেমছা কিপগেনেও অভিনন্দন জ্ঞাপন কৰে।
আনহাতে মীৰাবাই ছানুৰ মাতৃ টম্বিয়ে (৫৫) কন্যাৰ এই সাফল্যত আত্মহাৰা হৈ পৰে আৰু সোণৰ পদক আজুৰি আনিবলৈ সক্ষম হোৱাত অভিনন্দন জ্ঞাপন কৰে।