কলিয়াবৰত বনৰীয়া হাতীৰ গচকত প্ৰাণ গ’ল ৬০ বছৰীয়া বৃদ্ধৰ

হাতী-মানুহৰ সংঘাতত এজন ষাঠি বছৰীয়া বৃদ্ধই মৃত্যুক আকোৱালী লোৱা খবৰে পুনৰ কলিয়াবৰৰ কাৱৈমাৰী গাঁৱত শোকৰ ছাঁ পৰিছে। আজি পুৱতি নিশা কলিয়াবৰ অঞ্চলৰ বাসিন্দা এঘৰৰ ঘৰৰ পিছফালে প্ৰৱেশ কৰা এটা বনৰীয়া হাতীয়ে অচম্বিতে বৃদ্ধ লোকজনক আক্ৰমণ কৰাত লোকজনৰ মৃত্যু ঘটে। মৃত লোকজন ধুনীয়াৰাম বসুমতাৰী(৬০) বুলি জানিব পৰা গৈছে।

ধুনীয়াৰামৰ পৰিয়ালৰ লোকে জনোৱা অনুসৰি আজি পুৱতিনিশা ৩ মান বজাত মৃত ধুনীয়াৰামে ঘৰৰ পিছফালে যাওতেই বনৰীয়া হাতীটোৱে সন্মুখৰ পৰা আক্ৰমণ কৰে। আৰু আক্ৰমণ কৰাৰ ফলত থিতাতে লোকজনৰ মৃত্যু হয় ।

বনৰীয়া হাতীৰ আক্ৰমণত মৃত্যু হোৱা ঘটনাই সমগ্ৰ কাৱৈমাৰী অঞ্চলত এক শোকাকুল পৰিবেশৰ সৃষ্টি কৰিছে। ধুনীয়াৰামে মৃত্যুৰ সময়ত নিজৰ পত্নীসহ দুগৰাকী জীয়ৰীক এই সংসাৰত এৰি থৈ যায়।

ঘটনাস্থলীত আৰক্ষী আৰু বনবিভাগৰ লোক উপস্থিত হৈ মৃত লোকজনক মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী চিকিৎসালয়লৈ প্ৰেৰণ কৰে।

আনহাতে এই ঘটনাৰ পাছত স্থানীয় ৰাইজে বন বিভাগৰ নীৰৱ ভূমিকাৰ প্ৰতি বৃহৎ প্ৰশ্ন উত্থাপন কৰে। উক্ত অঞ্চলটোত বিগত বহু দিনৰে পৰাই বনৰীয়া হাতীয়ে উপদ্ৰৱ চলাই অহা বুলিও স্থানীয় ৰাইজে মত প্ৰকাশ কৰাৰ লগতে বন বিভাগে একো ব্যৱস্থা গ্ৰহণ নকৰাৰো অভিযোগ তোলে।