কলিয়াবৰৰ কুঁৱৰীটোলৰ সৌভাগ্য মাধৱ দেৱালয়ত চোৰে লুটিলে নগদ ধনসহ লক্ষাধিক টকাৰ অলংকাৰ

কলিয়াবৰৰ ঐতিহাসিক দেৱালয়ত নিশা চোৰৰ চাফাই অভিযানক লৈ তীব্ৰ প্ৰতিক্ৰিয়াৰ সৃষ্টি হৈছে। ঘটনাৰ বিৱৰণী মতে কুঁৱৰীটোলৰ মাধৱগাঁৱৰ সৌভাগ্য মাধৱ দেৱালয়ত বৃহস্পতিবাৰে নিশা চোৰে লুটি নিলে নগদ ধনসহ লক্ষাধিক টকাৰ আ-অলংকাৰ।

কিনকিনীয়া বৰষুণৰ মাজতে কলিয়াবৰৰ ঐতিহাসিক ‘সৌভাগ্য মাধৱ দেৱালয়ত বৃহস্পতিবাৰে নিশা চোৰে দেৱালয়খনৰ দৌলৰ গ্ৰীলৰ তলা ভঙাৰ লগতে মূল দুৱাৰ খুলি প্ৰৱেশ কৰে।

চোৰে দেৱালয়ৰ গোসাঁইৰ ৰূপৰ মুকুট, ৰূপৰ জাপি, সোণৰ অলংকাৰৰ লগতে লুটি নিয়ে দানপাত্ৰৰ নগদ ধন। পুৱা দেৱালয়ৰ সমীপতে পথাৰত উদ্ধাৰ হয় দুপাহ সোণৰ ফুলৰ লগতে এপাহ ৰূপৰ ফুল। প্ৰাত :ভ্ৰমণলৈ যোৱা লোকে এই অলংকাৰ উদ্ধাৰ কৰাৰ পাছতে দেৱালয়ত চোৰ সোমোৱা কথাটো ৰাষ্ট্ৰ হৈ পৰে।

স্থানীয় লোকে লগে লগে আৰক্ষীক খবৰ দিয়াত কিছু সময়ৰ পিছতে দেৱালয়ত উপষ্ঠিত হয় কলিয়বৰ আৰক্ষী। স্নিফাৰ ডগৰ সহায়ত দেৱালয় চৌহদত আৰক্ষীয়ে অনুসন্ধান চলাই যদিও ওৰে নিশা বৰষুণ দি থকাৰ ফলতে স্নিফাৰ ডগ বিফল হয়।

আনহাতে ১৬৪৬ শকত শিৱসিংহৰ ৰাজত্বতে স্থাপিত সৌভাগ্য মাধৱ দেৱালয়ত চোৰে চলোৱা লুট-পাত সন্দৰ্ভত মন্দিৰ পৰিচালনা সমিতিয়ে কলিয়াবৰ আৰক্ষী নিৱেশত এখন এজাহাৰ দাখিল কৰিছে। ঘটনাটোৱে অঞ্চলটোত তীব্ৰ প্ৰতিক্ৰিয়াৰ সৃষ্টি কৰাৰ লগতে ইয়াক গৰিহনা দিছে ৰাইজে।

মন্দিৰৰ পূজাৰী তথা মন্দিৰ পৰিচালনা সমিতিয়ে জনোৱা মতে চুৰি হোৱা আ -অলংকাৰ সমূহৰ মূল্য আনুমানিক এক লক্ষাধিক টকা হব ।