কলিয়াবৰৰ জখলাবন্ধাত সংঘটিত হৈছে বিধ্বংসী অগ্নিকাণ্ড

কলিয়াবৰৰ জখলাবন্ধাৰ মাজমজিয়াৰ ব্যৱসায়িক এলেকাত অৱস্থিত এখন লাইন হোটেলত বুধবাৰে সংঘটিত হয় এক ভয়াবহ অগ্নিকাণ্ড।

এখন বন্ধ হোটেলৰ ৰান্ধনি গৃহত সংঘটিত এই অগ্নিকাণ্ডই জখলাবন্ধাত বহু সময় ধৰি অঞ্চলটোৰ বাসিন্দাসকলক আতংকিত কৰি ৰাখে।

আক্ৰম খান নামৰ ব্যৱসায়ীজনৰ হোটেলত এই ভয়ংকৰ অগ্নিকাণ্ডটো সংঘটিত হয়। জখলাবন্ধাৰ একেবাৰে মাজমজিয়াত সংঘটিত হোৱা বিধ্বংসী অগ্নিকাণ্ডৰ ফলত চাৰিওপিনে হুৱা দুৱা লাগে।

অৱশ্যে,আৰক্ষী আৰু কলিয়াবৰৰ অগ্নি নিৰ্বাপক বাহিনীৰ তৎপৰতাত এই বিধংসী অগ্নিকাণ্ডটো নিৰ্বাপিত হয় আৰু অধিক ক্ষতি হোৱাৰ পৰা অঞ্চলটো ৰক্ষা পৰে।

জানিব পৰা মতে মেৰামতিৰ কাম চলি থকাৰ বাবে কিছুদিন ধৰি হোটেলখন বন্ধ হৈ আছিল। বৈদ্যুতিক বিজুতিৰ ফলতে অগ্নিকাণ্ডৰ সুত্ৰপাত হোৱাৰ সন্দেহ প্ৰকাশ কৰিছে আৰক্ষীয়ে।

আনহাতে এই  অগ্নিকাণ্ডৰ ফলত হোটেলখনৰ বহু সা-সামগ্ৰী ভস্মীভূত হয়।

আৰক্ষী, অগ্নি নিৰ্বাপক বাহিনী আৰু স্থানীয় ৰাইজৰ তৎপৰতাত সৌভাগ্যক্ৰমে কাষৰীয়া ব্যৱসায়িক প্ৰতিষ্ঠান সমুহৰ লগতে স্থানীয় আৱাসিক অঞ্চলটো অগ্নিকাণ্ডৰ পৰা ৰক্ষা পৰে।