কলিয়াবৰ ছাত্ৰ সন্থাৰ ৰঙালী বিহু উদযাপন : উখল-মাখল কুৱঁৰীটোলৰ গান্ধী পথাৰ

ব’হাগৰ প্ৰথম দিনটোত ঢোলৰ গুমগুমণি, বিহুগীতৰ সুৰত মতলীয়া হ’ল এজাক ডেকা গাভৰু। বিগত বৰ্ষৰ পৰম্পৰা অক্ষুণ্ণ ৰাখি এইবাৰো কলিয়াবৰ কেন্দ্ৰীয় ছাত্ৰ সন্থাই দিনজোৰা বৰ্ণাঢ্য কাৰ্যসূচীৰে পহিলা ব’হাগৰ দিনটোত  হেঁপাহৰ ৰঙালী বিহুটি উদযাপন কৰে। বিহুৰ উলাহত মুখৰিত হয় কুৱঁৰীটোলৰ গান্ধী খেলপথাৰ।

এই অনুষ্ঠানত কলিয়াবৰৰ সমন্বিত যুৱতীৰ্থই হুচঁৰি ,তেজপুৰৰ সুৰুজময় বিহুৱা দল ,শিৱসাগৰৰ জাজীঁপৰীয়া বিহুৱা দল ,ভালুকপুঙৰ মন ব’হাগী বিহুৱা দল আৰু কলিয়াবৰ কেন্দ্ৰীয় ছাত্ৰসন্থাৰ প্ৰশিক্ষিত এশগৰাকী নাচনীয়ে মুকলি বিহু প্ৰদৰ্শন কৰাৰ লগতে তেজপুৰৰ থেজপিয়ানে লোকবাদ্য – লোকনৃত্যানুষ্ঠান প্ৰদৰ্শন কৰে।

আনহাতে, জনপ্ৰিয় শিল্পী কৃষ্ণমণি নাথ, দুলুমণি শইকীয়াৰ বিহুগীতত  উদুলি- মুদুলি হৈ পৰে বিহুৰ বাকৰি। এই অনুষ্ঠানতে শিল্পী যোগেন বৰদলৈ, লক্ষী ভূঞা, ভূপেন্দ্ৰ নাথ হাজৰিকা ,সমুদ্ৰ বৰদলৈ ,যজ্ঞোৰাম বৰাক সম্বৰ্ধনা জনোৱা হয়। তদুপৰি, ৰঙালী বিহু উপলক্ষে ধ্ৰুৱজ্যোতি শৰ্মা ,পলাশ বৰা, সমীৰণ বৰা, কেশৱ পাচনী ,লাডৰাম পাচনীক অভিনন্দন  জনায় আয়োজক সমিতিয়ে।

এই অনুষ্ঠানতে জখলাবন্ধা আৰক্ষী চকীৰ সুদক্ষ ভাৰপ্ৰাপ্ত আৰক্ষী বিষয়া দেবেন বৰাক বিশেষ অভিনন্দন জ্ঞাপন কৰা হয়।

এনেদৰেই ব’হাগৰ প্ৰথম দিনটোত ৰঙৰে মতলীয়া হৈ পৰে কলিয়াবৰৰ কুঁৱৰীটোলৰ গান্ধী খেলপথাৰৰ বাকৰি।