কাইলৈৰ পৰা পাঞ্জাবাৰীত তিনিদিনীয়া কাৰ্য্যসূচীৰে অনুষ্ঠিত হ’ব শিল্পগ্ৰাম মহোৎসৱ ২০১৮

শিল্পগ্ৰাম হৈছে বিভিন্ন শিল্পকলাৰ লগত জডিত ব্যক্তিসকলক নিজৰ প্ৰতিভা প্ৰদৰ্শনৰ বাবে সুযোগ-সুবিধা আগবঢ়াই অহা এটি সাংস্কৃতিক অনুশীলনৰ কেন্দ্ৰ য’ত কাইলৈৰ পৰা দ্বাদশ প্ৰতিষ্ঠা দিৱস উপলক্ষে শিল্পগ্ৰাম মহোৎসৱ ২০১৮ অনুষ্ঠিত হ’ব। কাইলৈৰ পৰা অনুষ্ঠিত হ’বলগীয়া এই মহোৎসৱখন ২০ জানুৱাৰিলৈকে চলিব।

কাইলৈ সন্ধিয়া ৫:৩০ বজাত এই মহোৎসৱখনৰ শুভাৰম্ভণি হ’ব বুলি আয়োজক কমিটিয়ে জানিবলৈ দিছে। এই উদ্বোধনী অনুষ্ঠানত মুখ্য অতিথি হিচাপে নাগালেণ্ডৰ ৰাজ্যপাল তথা এন ই জেদ চি চি ৰ অধ্যক্ষ পদ্মনাভ বালকৃষ্ণ আচাৰ্য্য উপস্থিত থাকিব। উক্ত অনুষ্ঠানত বিশিষ্ট অতিথি  হিচাপে উপস্থিত থাকিব বিশিষ্ট শিক্ষাবিদ তথা সাহিত্যিক ড০ বীৰেন্দ্ৰনাথ দত্ত আৰু গুৱাহাটী বিশ্ববিদ্যালয়ৰ উপাচাৰ্য্য ড০ মৃদুল হাজৰিকা।

উদ্বোধনী অনুষ্ঠানৰ পিছতে ৬:৩০ বজাত বৰ্ণাঢ্য সাংস্কৃতিক অনুষ্ঠানৰ আৰম্ভণি হ’ব বুলি জানিব পৰা গৈছে। মঙ্গল আৰতি, কামৰূপীয়া ঢুলীয়া নৃত্য আৰু যোগনৃত্যৰে আৰম্ভ হ’বলগীয়া এই সাংস্কৃতিক নৃত্যানুষ্ঠানত দেশৰ বিভিন্ন প্ৰান্তৰ পৰা অহা নৃত্যৰ দলে অংশগ্ৰহণ কৰিব। এই সাংস্কৃতিক নৃত্যানুষ্ঠানৰ দ্বায়িত্বত থকা ড০ প্ৰসন্ন গগৈয়ে আমাক জানিবলৈ দিয়া মতে জন্মু-কাশ্মীৰৰ পৰা অহা ৰফ নৃত্য, গুজৰাটৰ সিদ্ধি গমা নৃত্য, মহাৰাষ্ট্ৰৰ লাৱানী নৃত্য আৰু উত্তৰ পূৰ্বাঞ্চলৰ ৮ খন ৰাজ্যৰ সংস্কৃতিক সামৰি প্ৰায় এক ঘন্টাজোৰা এটি দলীয় নৃত্য প্ৰদৰ্শন হ’ব।

মহোৎসৱৰ দ্বিতীয় দিনা বিয়লি ৩:০০ বজাৰ পৰা নৃত্য মন্দিৰ কলা নিকেতনৰ উদ্যোগত শিশু সকলৰ মাজত সুধাকন্ঠ ড০ ভূপেন হাজৰিকাৰ গীতৰ আধাৰত এখনি কৰ্মশালা অনুষ্ঠিত হ’ব। তদুপৰি এই মহোৎসৱখনিৰ মুখ্য আকৰ্ষণ হ’ব শিশুৰ প্ৰতিভা প্ৰদৰ্শনৰ মেলা, বিক্ৰম তালুকদাৰৰ যাদু প্ৰদৰ্শনী, পেইন্টিং তথা চিত্ৰাংকন কৰ্মশালা, লোকনৃত্য আৰু সংগীত, মূকাভিনয়, সোনাল মানসিং ৰ শাস্ত্ৰীয় নৃত্যকে ধৰি অসমৰ বিভিন্ন জনপ্ৰিয় শিল্পীৰ সংগীতৰ সমাহাৰ।

ইতিমধ্যে প্ৰস্তুতি প্ৰায় তুংগত বুলি আয়োজক কমিটিয়ে জানিবলৈ দিয়ে। দেশৰ বিভিন্ন প্ৰান্তৰ পৰা অহা কলা-কুশলী তথা প্ৰশিক্ষক সকলক আপ্যায়ণ কৰিব পৰাকৈ সকলো ব্যৱস্থা সাজু কৰি তোলা হৈছে বুলি আয়োজক কমিটিয়ে জানিবলৈ দিয়ে। গুজৰাট, মহাৰাষ্ট্ৰ আৰু উত্তৰ পূৰ্বাঞ্চলৰ নৃত্যৰ দলকেইটা আহি উপস্থিত হৈছেহি আৰু তেওঁলোকে বৰ্তমান অনুশীলনত ব্যস্ত আছে বুলি জানিব পৰা গৈছে।