কাইলৈ ১৭ মাৰ্চত বিজ্ঞানী ষ্টিফেন হকিঙৰ প্ৰতি গুৱাহাটীত শ্ৰদ্ধাঞ্জলি আৰু স্মৃতিচাৰণ অনুষ্ঠান
সমগ্ৰ বিশ্বৰ অগণিত বিজ্ঞানী আৰু বিজ্ঞানপ্ৰেমী জনসাধাৰণক শোকস্তব্ধ কৰি যোৱা ১৪ মাৰ্চত ষ্টিফেন হকিঙে শেষ নিশ্বাস ত্যাগ কৰিলে। পদাৰ্থবিজ্ঞান-জ্যোতিৰ্বিজ্ঞান-ব্ৰহ্মাণ্ডবিজ্ঞানৰ তাত্ত্বিক গৱেষক তথা অসাধাৰণ প্ৰতিভাৰ বিশ্ববৰেণ্য বিজ্ঞানী অধ্যাপক ষ্টিফেন হকিঙৰ স্মৃতিৰ প্ৰতি শ্ৰদ্ধাঞ্জলি জনোৱাৰ উদ্দেশ্যে কাইলৈ ১৭ মাৰ্চ শনিবাৰে গুৱাহাটীৰ তাৰকা গৃহ (প্লেনেটেৰিয়াম)ৰ সভাকক্ষত দিনৰ ৩.৩০ বজাত শ্ৰদ্ধাঞ্জলি আৰু এখন স্মৃতিচাৰণ সভাৰ আয়োজন কৰা হৈছে। এই কথা নৰ্থ-ইষ্ট নাওক জানিবলৈ দিছে এ আই পি এছ এনৰ যুটীয়া সম্পাদক ইচফাকুৰ ৰহমান আৰু কাৰ্যনিৰ্বাহক সমিতিৰ সদস্য অধ্যাপক তপন কুমাৰ শৰ্মাৰ লগতে ইলোৰা বিজ্ঞান মঞ্চৰ সাধাৰণ সম্পাদক কমলেশ গুপ্ত স্বাক্ষৰিত এক বিজ্ঞপ্তি যোগে।
স্মৃতিচাৰণ সভাখনৰ মূল উদ্যোক্তা হ’ল নিখিল ভাৰত জনবিজ্ঞান আন্দোলন (এ আই পি এছ এন)ৰ অন্তৰ্ভুক্ত অসমৰ চাৰিটা সংগঠন, সেইকেইটা হ’ল ক্ৰমে- অসম বিজ্ঞান সমিতি, ইলোৰা বিজ্ঞান মঞ্চ, জ্ঞান-বিজ্ঞান সমিতি, অসম আৰু চি আৰ ইউ (উত্তৰ-পূৰ্বাঞ্চল)।
এই সভাৰ লগত যুক্ত হৈছে আৰু পূৰ্ণ সহযোগিতা আগ বঢ়াইছে গুৱাহাটী প্লেনেটৰিয়ামৰ কর্তৃপক্ষ আৰু প্ৰাগজ্যোতিষ এমেচিয়াৰ এষ্ট্ৰ’নমিকেল ছ’চাইটিয়ে।
সভাত সভাপতিত্ব কৰিব বিশিষ্ট শিক্ষাবিদ তথা পদাৰ্থবিজ্ঞানী ড০ অনিল গোস্বামীয়ে আৰু নিৰ্দিষ্ট বক্তাৰ ভাষণ দিব বিশিষ্ট প্লাজমা পদাৰ্থবিজ্ঞানী ড০ সৰ্বেশ্বৰ বুজৰবৰুৱা আৰু ডঃ বিপুলজ্যোতি শইকীয়াৰ লগতে অসম বিজ্ঞান সমিতিৰ প্ৰাক্তন সভাপতি ড০ বাৰীন্দ্ৰ কুমাৰ শৰ্মাই।
এই অনুষ্ঠানত উপস্থিত থাকি বিজ্ঞান জগতৰ অন্যতম জ্যোতিষ্ক ষ্টিফেন হকিঙৰ প্ৰতি শ্ৰদ্ধা জনোৱাৰ বাবে উদ্যোক্তা সংগঠনসমূহে সকলো বিজ্ঞানপ্ৰেমী জনসাধাৰণৰ প্ৰতি আবেদন জনাইছে।