কাজিৰঙাৰ মনোমোহা দৃশ্যত শ্বুটিঙত ব্যস্ত MTV ৰোডিজৰ দল

নেশ্যনেল টেলিভিছন MTV ৰ জনপ্ৰিয় ৰিয়েলিটি শ্ব’ ৰোডিজ এক্সট্ৰিম চিজন ১৬ৰ দলটো চিত্ৰগ্ৰহণৰ বাবে ব্যস্ত থকা পৰিলক্ষিত হৈছে কাজিৰঙা ৰাষ্ট্ৰীয় উদ্যানত।

এই জনপ্ৰিয় ৰিয়েলিটি শ্ব’টোৰ চিত্ৰগ্ৰহণৰ বাবে অসমলৈ আহিছে গেং লীডাৰ নেহা ধুপীয়া, নিখিল চিনাপা, ৰাফতাৰ আৰু প্ৰিন্স নাৰুলা ।

উল্লেখ্য যে ৰোডিজৰ এই গেং লীডাৰসকল দৃশ্যগ্ৰহণৰ বাবে অসমত উপস্থিত হোৱাৰ পূৰ্বে মেঘালয়ৰ শ্বিলঙতো দৃশ্যগ্ৰহণ সম্পূৰ্ণ কৰিছে। কাজিৰঙাৰ মনোমোহা ঠাইত দৃশ্যগ্ৰহণত ব্যস্ত থকা এই দলটোৱে ইয়াৰ পাছত যাব ভালুকপুং, ইটানগৰ আৰু জিৰোলৈ।

এই শ্ব’টোৰ বিশেষ আকৰ্ষণ ৰনবিজয় সিঙে এইবাৰ ৰিং মাষ্টাৰ হিচাপে দায়িত্ব গ্ৰহণ কৰা দেখা যাব। উল্লেখ্য যে ৰনবিজয়ে এই শ্ব’টোৰ আৰম্ভণি কৰিছিল এজন প্ৰতিযোগী হিচাপে।

অভিনেত্ৰী নেহা ধুপীয়াই উল্লেখ কৰি কয় যে বিভিন্ন বাধা থকা স্বত্ত্বেও শ্ব’টোৰ প্ৰতি থকা অদম্য প্ৰীতিৰ বাবে মই পুনৰ শ্ব’টোৰ মাজলৈ উভটি আহিছো।

আনহাতে ৰনবিজয়ে কয়- এইবাৰ আমি ৰোডিজৰ দৃশ্যগ্ৰহণৰ বাবে উত্তৰ-পূৰ্বাঞ্চললৈ আহিছো কাৰণ এই অঞ্চলটো অতিকৈ আকৰ্ষণীয়।

‘উষ্ণতা আৰু বাসপযোগীৰ বাবে উৎকৃষ্ট.. আমি প্ৰাকৃতিক সৌন্দৰ্যতাৰ বাবে উত্তৰ-পূবলৈ আহিছো.. তাৰোপৰি উত্তৰ-পূবক মই বহু ভাল পাওঁ, এইদৰে ৰোডিজৰ প্ৰথম সংস্কৰণৰ বিজেতা ৰনবিজয়ে মত ব্যক্ত কৰে।

উল্লেখ্য যে MTV যোগে প্ৰচাৰিত ৰোডিজ হ’ল সম্পূৰ্ণ যুৱকসকলৰ এক ৰিয়েলিটি শ্ব’। এই শ্ব’টো প্ৰথম প্ৰচাৰ হৈছিল ২০০৩ চনত। ৰোডিজত বিভিন্ন প্ৰতিযোগী থাকে আৰু প্ৰতিযোগীসকলে শ্ব’টোৰ নিয়ম অনুযায়ী শাৰিৰীক আৰু মানসিক শক্তি প্ৰয়োগ কৰি বিভিন্ন ধৰণৰ কাৰু-কাৰ্য সম্পন্ন কৰিব লাগে।