কোকৰাঝাৰত পৃথক বড়োলেণ্ডৰ দাবীত ৩১ নম্বৰ ৰাষ্ট্ৰীয় ঘাইপথ অৱৰোধ

আজি কোকৰাঝাৰত এবছু, এন ডি এফ বি ( পি) আৰু পিপুলছ জইণ্ট একশ্যন কমিতি ফৰ বড়োলেণ্ড মুভমেণ্টে  পৃথক বড়োলেণ্ডৰ দাবীত আহ্বান জনোৱা পথ অৱৰোধ কাৰ্যসূচীত পুনৰবাৰ উত্তাল হৈ পৰিল কোকৰাঝাৰৰ কাৰিগাঁও।

এই তিনিওটা দল-সংগঠনৰে শ শ প্ৰতিবাদকাৰী লোকে হাতে হাতে বেনাৰ পোষ্টাৰ লৈ ওলাই আহি পৃথক বড়োলেণ্ডৰ দাবীত ৩১ নম্বৰ ৰাষ্ট্ৰীয় ঘাইপথ অৱৰোধ কৰা পৰিলক্ষিত হয়।

আজি ৰাতিপুৱা ৫ বজাৰ পৰা ১২ ঘণ্টীয়া ৰাষ্ট্ৰীয় ঘাইপথ অৱৰোধ কাৰ্যসূচীৰ আহ্বান কৰা সংগঠনকেইটাৰ সমৰ্থকসকলে ৰাতিপুৱাতে ৩১ নম্বৰ ৰাষ্ট্ৰীয় ঘাইপথ অৱৰোধ কৰাৰ লগতে ৰাজ্য আৰু কেন্দ্ৰীয় চৰকাৰৰ বিৰুদ্ধে বিভিন্ন শ্লোগান আওৰাই তীব্ৰ প্ৰতিবাদ সাব্যস্ত কৰা দেখা যায়।

মনকৰিবলগীয়া যে পৃথক বড়োলেণ্ডৰ দাবীত গ্ৰহণ কৰা এই অৱৰোধ কাৰ্যসূচীৰ ফলত ৩১ নম্বৰ ৰাষ্ট্ৰীয় ঘাইপথত শ শ যান বাহন আবদ্ধ হৈ পৰাৰ লগতে দূৰণিৰ পৰা অহা যাত্ৰীসকল বিভিন্ন সমস্যাৰ সন্মুখীন হোৱা বুলিও জানিব পৰা গৈছে।

উল্লেখযোগ্য যে বড়ো সকলে পৃথক ৰাজ্যৰ দাবীত দীৰ্ঘ দিন ধৰি আন্দোলন কৰি আহিছে। এই ক্ষেত্ৰত ২০১৭ চনৰ ২৬ এপ্ৰিলত বিজেপি চৰকাৰৰ গৃহ মন্ত্ৰী ৰাজনাথ সিং, মুখ্য মন্ত্ৰী সৰ্বানন্দ সোণোৱালৰ উপস্থিতিত বৈঠক আয়োজন কৰি বড়োলেণ্ড সমস্যা সমাধানৰ আশ্বাস প্ৰদান কৰিছিল।

কিন্তু ইয়াৰ এবছৰ পাছতো কোনো সমাধান সূত্ৰ নোলোৱাত পুনৰ এইদৰে বড়ো দল-সংগঠন সমূহে চৰকাৰৰ বিৰুদ্ধে প্ৰতিবাদ সাব্যস্ত কৰা পৰিলক্ষিত হৈছে।