কোচ ৰাজবংশী একত্ৰিত তথা ঐক্যবদ্ধ হৈছে, গতিকে আন্দোলন তীব্ৰতৰ হ’ব : আক্ৰাছু

সদৌ কোচ ৰাজবংশী ছাত্ৰ সন্থা চমুকৈ আক্ৰাছুই ২৮ জুনত বঙাইগাঁও গান্ধী ময়দানত বিভিন্ন জাতি-জনগোষ্ঠী সংগঠনৰ উপস্থিতিত কমতাপুৰ আৰু জনজাতিকৰণৰ দাবীত এখন বিশাল গণ সমাবেশ অনুষ্ঠিত কৰিব। সোমবাৰে সংগঠনটোৱে এক সংবাদমেলৰ আয়োজন কৰি এই কথা জানিবলৈ দিয়ে ।

সন্থাৰ সভাপতি অৰুণ কুমাৰ আৰু সাধাৰণ সম্পাদক গোকুল বৰ্মনে সম্বোধন কৰা সংবাদমেলত কয় যে এই গণ সমাবেশৰ পাছতে আক্ৰাছুয়ে স্থগিত ৰখা আন্দোলন পুনৰ আৰম্ভ কৰিব। কোচ ৰাজবংশী ৰাইজ একত্ৰিত হৈছে, ঐক্যবদ্ধ হৈছে, গতিকে আন্দোলন তীব্ৰতৰ কৰি তোলা হ’ব।

উল্লেখ্য যে যোৱা ২১ মে’ত সদৌ কোচ ৰাজবংশী ছাত্ৰ সন্থাৰ সঁজাতি দলে অসম আৰক্ষীৰ অতিৰিক্ত আৰক্ষী সঞ্চালক প্ৰধান পল্লব ভট্টাচাৰ্যৰে বৈঠকত মিলিত হয়। আৰু এই বৈঠকতে ভট্টাচাৰ্যই এসপ্তাহৰ ভিতৰত মুখ্য মন্ত্ৰী সৰ্বানন্দ সোণোৱালৰ সৈতে মিলিত হৈ ত্ৰিপাক্ষিক বৈঠক অনুষ্ঠিত কৰাৰ প্ৰতিশ্ৰুতি দিছিল। কিন্তু প্ৰতিশ্ৰুতি অনুসৰি কোনো পদক্ষেপ গ্ৰহণ নকৰাত এতিয়া তীব্ৰ ক্ষোভ প্ৰকাশ কৰিছে আক্ৰাছুৱে।

সংগঠনটোৰ নেতৃদ্বয়ে অসম চৰকাৰক এসপ্তাহৰ ভিতৰত স্থিতি স্পষ্ট কৰিবলৈ দাবী জনোৱাৰ লগতে যদিহে কোনো ব্যৱস্থা গ্ৰহণ নকৰে তেন্তে ৩০ জুনৰ পৰা তীব্ৰ গণ আন্দোলন গঢ়ি তুলিব বুলি হুংকাৰ প্ৰদান কৰে।