গঁড় হত্যাকাণ্ডৰ বিৰুদ্ধে সৰৱ হৈ পৰিছে শাসকীয় দলৰ বিধায়ক মৃণাল শইকীয়া

এইবাৰ গঁড় হত্যাকাণ্ডৰ প্ৰতি সৰৱ হোৱা দেখা গ’ল  শাসকীয় দলৰে এগৰাকী বিধায়কক। খুমটাই সমষ্টিৰ বিজেপি বিধায়ক মৃণাল শইকীয়াই অভাৱনীয় হাৰত বৃদ্ধি পোৱা গঁড় হত্যাৰ বাবে দোষাৰোপ কৰিলে বনবিভাগক। বনবিভাগৰ চৰম ব্যৰ্থতাৰ বাবেই যোৱা দুই তিনিমাহৰ ভিতৰত কাজিৰঙা ৰাষ্ট্ৰীয় উদ্যানত চোৰাং চিকাৰীয়ে ৪ টাকৈ গঁড় হত্যা কৰিবলৈ সক্ষম হ’ল।

বনবিভাগক দোষাৰোপ কৰি শাসকীয় দলৰ বিধায়ক জনে উল্লেখ কৰে যে, বন বিভাগৰ বিষয়া-কৰ্মচাৰী সকলৰ উপস্থিতিতে চোৰাং চিকাৰীয়ে বিশ্ব বিখ্যাত এশিঙীয়া গঁড়ৰ খড়্গ কাটি উধাও হয়।

‘গঁড় হত্যা ৰোধ কৰাৰ বিপৰীতে এই বন বিষয়াসকল বৰ্তমান ব্যস্ত আছে শিল-বালি মহলত। তেওঁলোকে শিল-বালি ছিণ্ডিকেট থকা ঠাইত কাম কৰি ভাল পায়। কিয়নো তাত অসৎ পথেৰে টকা উপাৰ্জন কৰিব পাৰে। যাৰবাবে বন তথা বন্য প্ৰাণী সুৰক্ষাৰ ক্ষেত্ৰত তেঁওলোকৰ গুৰুত্ব কম’, এনেদৰে তাৎপৰ্যমূলক মন্তব্য কৰা দেখা যায় বিধায়ক শইকীয়াক।

বনবিভাগৰ একাংশ দুৰ্নীতি পৰায়ণ বনকৰ্মী আৰু বনবিষয়াৰ বাবেই বন্যপ্ৰাণী হত্যা ৰোধ কৰাত চূড়ান্ত ব্যৰ্থ হৈছে বনবিভাগ। দেওবাৰে সংবাদ মাধ্যমৰ আগত এনেদৰে নিজৰ প্ৰতিক্ৰিয়া প্ৰকাশ কৰা দেখা যায় বিধায়ক মৃণাল শইকীয়াক।

আনহাতে কৰ্তব্যত গাফিলতি কৰা বন বিষয়া তথা কৰ্মচাৰীসকলৰ ওপৰত দৃষ্টান্তমূলক শাস্তি গ্ৰহণৰো পোষকতা কৰে বিধায়কজনে।

ইফালে বন বিভাগে গঁড় হত্যা ৰোধ কৰাত ব্যৰ্থ হোৱাৰ বাবে কাজিৰঙা আঞ্চলিক ছাত্ৰ সন্থা সমিতিয়ে ৩৭ নং ৰাষ্ট্ৰীয় ঘাইপথত বন মন্ত্ৰী প্ৰমীলা ৰাণী ব্ৰহ্মৰ প্ৰতিমূৰ্তি দাহ কৰি উত্তাল প্ৰতিবাদ সাব্যস্ত কৰা দেখা যায়। প্ৰতিবাদৰ সময়ত ছাত্ৰ সংগঠনটোৰ সদস্যই বিভিন্ন শ্লোগান দিয়াও পৰিলক্ষিত হয়।