‘গাঁৱলৈ বলক’ শীৰ্ষক আঁচনি ৰূপায়ণ সন্দৰ্ভত মুখ্য মন্ত্ৰী বীৰেন সিঙৰ পৰ্যালোচনা সভা

মণিপুৰৰ সৰ্বসাধাৰণ ৰাইজক সকলো ক্ষেত্ৰতে অগ্ৰাধিকাৰ দি তেওঁলোকৰ প্ৰয়োজন আৰু সমস্যা সমূহ অতি শীঘ্ৰে সমাধান কৰিবলৈ ৰাজ্যখনৰ সকলো শীৰ্ষ পৰ্যায়ৰ বিষয়াকে মুখ্য মন্ত্ৰী এন বীৰেন সিঙে নিৰ্দেশ দিয়ে।

মুখ্য মন্ত্ৰীৰ সচিবালয়ৰ কেবিনেট হলত সোমবাৰে অনুষ্ঠিত হোৱা ‘গাঁৱলৈ বলক’ শীৰ্ষক আঁচনিৰ এখন পৰ্যালোচনা সভাত মুখ্য মন্ত্ৰীগৰাকীয়ে এই নিৰ্দেশ দিয়ে।

পৰ্যালোচনা সভাখনত ৰাজ্যৰ মুখ্য সচিব, আৰক্ষী সঞ্চালক প্ৰধান, প্ৰশাসনীয় সচিবৰ লগতে বিভিন্ন বিভাগৰ শীৰ্ষ পৰ্যায়ৰ বিষয়া সকল উপস্থিত আছিল।

জনসাধাৰণৰ আশা, সমস্যা আৰু প্ৰয়োজন সমূহ পূৰণৰ বাবে ‘গাৱলৈ বলক’ শীৰ্ষক আঁচনিখন ৰূপায়ণ কৰা হোৱা বুলি আলোচনাৰ সময়ত মুখ্য মন্ত্ৰী বীৰেন সিঙে জানিবলৈ দিয়ে।

তেওঁ লগতে জনসাধাৰণৰ সমস্যা সমূহ বুজ লোৱা তথা স্তব্ধ হৈ থকা আঁচনি সমূহ এমাহৰ ভিতৰত কাৰ্যক্ষম কৰি তুলিবলৈ অতি শীঘ্ৰে ব্যৱস্থা ল’বলৈও আলোচনাত উপস্থিত থকা বিষয়াসকলক আহ্বান জনায়।

‘গাঁৱলৈ বলক’ শীৰ্ষক আঁচনিখন সফলতাৰে ৰূপায়ণ কৰাৰ ক্ষেত্ৰত সহায় সহযোগিতা আগবঢ়োৱা সকলো বিষয়াকে মুখ্য মন্ত্ৰীগৰাকীয়ে আন্তৰিকতাৰে ধন্যবাদ জ্ঞাপন কৰে। আৰু আলোচনাত উপস্থিত থকা বিষয়াসকলৰ পৰা এই আঁচনিখন সম্পৰ্কত বিভিন্ন পৰামৰ্শৱলীও গ্ৰহণ কৰে।

উল্লেখ্য যে ৰাজ্যখনৰ সকলো জনসাধাৰণৰে তথা দুৰ্গম অঞ্চলসমূহৰ উন্নয়ন সাধন কৰাৰ লক্ষ্যৰে ৰাজ্য চৰকাৰে যোৱা ১ মে’ত এই আঁচনিখন শুভাৰম্ভ কৰিছিল।

মণিপুৰৰ সকলো গাঁৱকে এই আঁচনিৰ অধীনত সামৰি লোৱাৰ উদ্দেশ্যে তেওঁলোকৰ অভাৱ অভিযোগ সমূহ দৃষ্টিগোচৰ কৰাৰ উদ্দেশ্যে সপ্তাহৰ প্ৰতিটো মঙলবাৰে চৰকাৰৰ তত্বাৱধানত এটা শিবিৰৰ আয়োজন কৰিব।

মন কৰিবলগীয়া যে আঁচনিখনৰ উদ্বোধনৰ দিনাই ৰাজ্যবাসীৰ পৰা ৬০,৩৩৯ খন আবেদন লাভ কৰিছিল আৰু ইয়াৰে ২১,৩৫৩ খন আবেদনৰ গোচৰ উক্ত দিনাই গৃহীত কৰা হৈছিল।