গুৱাহাটীত ব্ৰহ্মপুত্ৰৰ বুকুত চলিব লগা নদী টেক্সিৰ পৰীক্ষামূলক সেৱা আৰম্ভ

ব্ৰহ্মপুত্ৰৰ বুকুত গুৱাহাটীত চলিব লগা নদী টেক্সিৰ মঙলবাৰে মাছখোৱাৰ লাচিত ঘাটত পূৰ্ব উদ্বোধনী অনুষ্ঠিত হয়।

টেক্সি সেৱা আগবঢ়োৱা দেশীয় প্ৰতিষ্ঠান অ’লাৰ সৈতে অসম চৰকাৰে এপ ভিত্তিক নদী টেক্সি সেৱাৰ বাবে এক বুজাবুজি চুক্তি স্বাক্ষৰিত কৰিছিল।

এই নদী টেক্সি সেৱাত অ’লাই এপ আগবঢ়োৱাৰ বিপৰীতে টেক্সিসমূহ আগবঢ়াব The Maritime Group (International)এ।

সদ্যহতে দিনৰ ভাগতে এই টেক্সিসমূহ চলিব।

গুৱাহাটীত সদ্য সমাপ্ত বিশ্ব বিনিয়োগকাৰী সন্মিলনত অসম চৰকাৰৰ সৈতে এই চুক্তি স্বাক্ষৰিত হৈছিল।

আজি ব্ৰহ্মপুত্ৰৰ উত্তৰ আৰু দক্ষিণ পাৰৰ মাজত তি এম জি (এছিয়া)ৰ অংশ পাতছ্ল’ক মেৰিনে এখন ৮ জনীয়া যাত্ৰী পৰিবাহী টেক্সিৰ সেৱা আৰম্ভ কৰিছে।

অৱশ্যে মুখ্য মন্ত্ৰী সৰ্বানন্দ সোণোৱালৰ উপস্থিতিতহে এই সেৱাৰ বিভাগীয় উদ্বোধন হ’ব।

এই সেৱাত ব্যৱহাৰ হ’ব লগা নৌকাসমূহৰ সৰ্বোচ্চ গতিবেগ হ’ব ৩০ কিমি/ ঘণ্টা।

এতিয়া চলি থকা নৌকাসমূহতকৈ এই নতুন নৌকাসমূহৰ বেগ বেছি আৰু এইসমূহে বৰ্তমান পথেৰে পৰিৱহণ কৰিলে লগা ৪৫ মিনিট সময় ২-৫ মিনিটলৈ হ্ৰাস কৰিব।

আজিৰ যাত্ৰা পৰীক্ষামূলক বুলি জনাই তি এম জি (এছিয়া)ৰ পৰিচালন সঞ্চালক কে’ শ্ৰীনিৱাস পাটনায়কে কয়, ‘যদি চব ঠিক ঠাক থাকে তেন্তে দুসপ্তাহৰ ভিতৰত এই সেৱাৰ আনুষ্ঠানিক উদ্বোধন কৰা হ’ব।’

তেওঁ লগতে জনায় যে বাৰিষাৰ ভৰা ব্ৰহ্মপুত্ৰত এই সেৱা বন্ধ থাকিব।