গ্ৰাম স্বৰাজ অভিযান : মাজুলীৰ প্ৰগতিশীল কৃষক-মীনপালক-পশুপালক-ৰেচম উৎপাদকক সম্বৰ্ধনা
দেশজোৰা গ্ৰাম স্বৰাজ অভিযানৰ অংশ হিচাপে আজি মাজুলীৰ দুয়োটা উন্নয়ন খণ্ড পৰ্যায়তো জিলা কৃষি বিভাগে ‘কৃষি কল্যাণ কৰ্মশালা’ অনুষ্ঠিত কৰে। মাজুলী উন্নয়ন খণ্ডৰ এলেকাধীন কৃষকসকলৰ বাবে কমলাবাৰীৰ মাজুলী মিলন সংঘত আৰু উজনি মাজুলী উন্নয়ন খণ্ড এলেকাক সামৰি উজনি মাজুলী উন্নয়ন খণ্ড প্ৰেক্ষাগৃহত এই কৰ্মশালা অনুষ্ঠিত কৰা হয়।
কেন্দ্ৰীয় কৃষি মন্ত্ৰ্যালয়ৰ নিৰ্দেশত মাজুলী জিলা প্ৰশাসনৰ সহযোগত জিলা কৃষি বিভাগে আয়োজন কৰা এই কৰ্মশালাত কৃষি বিভাগৰ লগতে পশুপালন আৰু পশু চিকিৎসা, মীন আৰু ৰেচম বিভাগৰ বিষয়া-সমল ব্যক্তিয়ে বিভাগকেইটাৰ দ্বাৰা কৃষকৰ কল্যাণৰ বাবে গ্ৰহণ কৰা আঁচনিসমূহ ব্যাখ্যা কৰে।
কমলাবাৰীৰ মাজুলী মিলন সংঘত বুধবাৰে আয়োজিত কৰ্মশালাখন সঞ্চালনা কৰে জিলা কৃষি বিষয়া অৰুণ কুমাৰ পাঠকে। কৰ্মশালাখনত জিলা কৃষি বিষয়া পাঠকৰ লগতে মহকুমা পশু চিকিৎসা বিষয়া ডা: দণ্ডধৰ বৰ্মণ, কৃষি অভিযান্ত্ৰিক বিভাগৰ সহকাৰী কাৰ্যবাহী অভিযন্তা ভূপেন দাস, মীন সম্পসাৰণ বিষয়া যুগল হাজৰিকা, ৰেচম বিভাগৰ দেৱজিত শইকীয়াই নিজ নিজ বিভাগে কৃষক, মীনপালক, পশুপালক আৰু ৰেচম শিল্পীসকলক উপকৃত কৰিবলৈ হাতত লোৱা আঁচনিসমূহৰ বিযষয়ে উপস্থিত কৃষক ৰাইজক অৱগত কৰে।
দুয়োটা উন্নয়ন খণ্ডৰ অধীনত আয়োজিত অনুষ্ঠানত প্ৰধানমন্ত্ৰী কৃষি সিঞ্চাই যোজনাৰ বিষয়েও বিশেষ প্ৰচাৰ চলোৱাৰ লগতে মুঠ ৮ গৰাকী প্ৰগতিশীল কৃষক, পশুপালক, মীনপালক আৰু ৰেচম উৎপাদকক ৰাজহুৱা ভাৱে সম্বৰ্ধনা জনোৱা হয়।
তদুপৰি, আজিৰ কৰ্মশালাৰে অংশ হিচাপে সংহত কৃষিকৰ্মৰে জৰিত বিভিন্ন দিশ সন্দৰ্ভত কৃষি বিশেষজ্ঞ তথা বিভাগীয় বিষয়াসকলৰ সৈতে কৃষকৰ মত বিনিময় অনুষ্ঠানো সম্পন্ন কৰা হয়।
আনহাতে, এই কাৰ্যসূচীৰে সংগতি ৰাখি মাজুলী উন্নয়ন খণ্ড এলেকাধীন গড়মূৰৰ একাধিক গাঁও আৰু উজনি মাজুলী উন্নয়ন খণ্ডৰ মনভালচুকত মহকুমা পশুপালন আৰু পশু চিকিৎসা বিভাগে আজি বিনামূলীয়া পশু চিকিৎসা শিবিৰ অনুষ্ঠিত কৰে।