চলিত বৰ্ষৰ ডিচেম্বৰৰ ভিতৰত মণিপুৰৰ ঘৰে ঘৰে জ্বলিব বিদুৎ

চলিত ২০১৮ বৰ্ষৰ ডিচেম্বৰ মাহৰ ভিতৰত মণিপুৰৰ সকলো পৰিয়ালকে বিদুৎ সংযোগ প্ৰদান কৰা হ’ব বুলি ৰবিবাৰে মন্তব্য কৰে মণিপুৰৰ শক্তি মন্ত্ৰী থংগাম বিশ্বজিৎ সিঙে। তেওঁ লগতে বিদুৎ অবিহনে উদ্যোগীকৰণ প্ৰক্ৰিয়া অসম্ভৱ বুলিও তাৎপৰ্যমূলক মন্তব্য আগবঢ়ায়।

মণিপুৰৰ উখৰুল জিলাৰ ৰিংগুই গাঁৱত আয়োজিত সাংস্কৃতিক তথা ৰিংগুই লুইৰা ফানিট মহোৎসৱ ২০১৮ত অংশগ্ৰহণ কৰি মন্ত্ৰী বিশ্বজিতে ৰবিবাৰে সন্ধিয়া উক্ত কথা প্ৰকাশ কৰে।

ৰাজ্যখনৰ টাংখুল সম্প্ৰদায়ৰ মাজত প্ৰচলিত এই মহোৎসৱত চিংগাই সমষ্টিৰ বিধায়ক কাছিম ভাছুমো উপস্থিত থাকে।

এই মহোৎসৱত মন্ত্ৰী বিশ্বজিতে চৰকাৰে লোৱা বিভিন্ন আঁচনিৰ কথা কোৱা পৰিলক্ষিত হয়। লগতে ৰাজ্যখনৰ সকলো লোককে চৰকাৰী আঁচনি সমূহৰ সম্পূৰ্ণ সুবিধা গ্ৰহণ কৰিবলৈ মন্ত্ৰীজনে অনুৰোধ জনায়।

এই পৰ্যন্ত বিদুৎ সংযোগৰ পৰা বিচ্ছিন্ন পৰিয়াল সমূহ চিনাক্ত কৰিবলৈ মন্ত্ৰীগৰাকীয়ে গাঁও কৰ্তৃপক্ষ আৰু বিভাগীয় লোকক নিৰ্দেশ দিয়ে। তাৰোপৰি প্ৰধান মন্ত্ৰীয়ে এই লোকসকলৰ বাবে সম্পূৰ্ণ বিনামূলীয়া তথা অতি কম মূল্যতে বিদুৎ সংযোগৰ আঁচনি আৰম্ভ কৰাৰ কথাও উল্লেখ কৰে।

ইয়াৰ উপৰি ‘সৌভাগ্য’ আঁচনিৰ জৰিয়তে দেশৰ বিদুৎ সংযোগ নোপোৱা পৰিয়াল সকলক অতি শীঘ্ৰে বিদুৎ সংযোগ প্ৰদান কৰাৰ উদ্দেশ্যেৰে এই আঁচনি গ্ৰহণ কৰা হোৱা বুলি জনায়।