চাকৰিৰ প্ৰাদেশিকীকৰণকে ধৰি ৮টা দাবীত ডিব্ৰুগড়ত পৌৰকৰ্মীৰ ধৰ্মঘট
সদৌ অসম পৌৰকৰ্মী ফেডাৰেশ্যনৰ ডিব্ৰুগড় গোটে যোৱা তিনিদিন ধৰি চলাই অহা ধৰ্মঘট কাৰ্যসূচীৰ ফলত সমগ্ৰ নগৰখনে জাবৰে ভৰি পৰিছে।
উল্লেখযোগ্য যে সংস্থাটোৱে দীৰ্ঘদিন ধৰি তেওঁলোকৰ চাকৰিৰ প্ৰাদেশিকীকৰণৰ দাবী জনাই আহিছে।
তেওঁলোকে ৰাজ্যখনৰ সকলো পৌৰ কৰ্মচাৰীৰ বাবে এটা স্পষ্ট ‘ষ্টাফিং পেটাৰ্ন’ৰ দাবী জনাই অহাৰ লগতে পৌৰ নিগম সমূহত মাষ্টাৰ-ৰোল, ফিক্সড পে’ আৰু ঠিকাভিত্তিক থকা সকলো কৰ্মচাৰীৰে নিযুক্তি নিয়মিয়াকৰণ কৰা দাবী জনাই আহিছে।
ডিব্ৰুগড় পৌৰসভাৰ এজন কৰ্মচাৰীয়ে নৰ্থ-ইষ্ট নাওক জনাই, ‘১৮ মাহ ধৰি দৰ্মহা পোৱা নায়। চৰকাৰে আমাৰ চাকৰি নিয়মিয়া কৰাৰ লগতে সকলো বকেয়া ধন মুকলি কৰি দিব বুলি প্ৰতিশ্ৰুতি দি আহিছে যদিও আমি কিন্তু একো পোৱা নায়।’
উল্লেখযোগ্য যে ডিব্ৰুগড় পৌৰসভাৰ চাফাই কৰ্মীকে ধৰি সকলো কৰ্মচাৰীয়ে বুধবাৰৰ পৰা নিজ দায়িত্বৰ পৰা বিৰত আছে। ফলত গোটেই নগৰখনতে জাবৰে ভৰি পৰি পূতিগন্ধময় পৰিৱেশৰ সৃষ্টি হৈছে।
চৰকাৰক ভাবুকি জনাই এজন পৌৰকৰ্মীয়ে কয়, ‘যদিহে সোমবাৰৰ ভিতৰত চৰকাৰে আমাৰ দাবী মানি নলয় তেন্তে আমি আমাৰ ধৰ্মঘট অনিৰ্দিষ্ট কাললৈ চলাই যাম।’