চানমাৰিত কাৰ্বি আংলঙৰ ঘটনাৰ প্ৰতিবাদকাৰীৰ ওপৰত আৰক্ষীৰ লাঠীচালনা : বহুকেইজন আহত

আজি চানমাৰি কমাৰ্চ পইণ্টত ছাত্ৰ-ছাত্ৰী আৰু শিল্পীসমাজ একত্ৰিত হৈ কাৰ্বি আংলঙত নৃশংসতাৰ বলি হোৱা গুৱাহাটীৰ দুজন যুৱকৰ ন্যায় দাবী কৰি মম জ্বলাই প্ৰতিবাদ কৰা প্ৰতিবাদকাৰীৰ ওপৰত আৰক্ষীয়ে লাঠীচালনা কৰাৰ ফলত কেইবাজনো আহত হয়।

শান্তিপূৰ্ণভাৱে প্ৰায় তিনি ঘণ্টা চলি থকা প্ৰতিবাদৰ মাজতে প্ৰথমে আৰক্ষী আৰু প্ৰতিবাদকাৰীৰ মাজত বাক-বিতণ্ডা হয় আৰু পিছলৈ ই হতাহতিৰ ৰূপ লয়।

উল্লেখযোগ্য যে কোনো দল-সংগঠনৰ বেনাৰত নহয়, মহানগৰীৰ এচাম ছাত্ৰ-ছাত্ৰী আৰু শিল্পী সমাজৰ উদ্যোগত অনুষ্ঠিত হোৱা এই প্ৰতিবাদী কাৰ্য্যসূচীত আৰক্ষীয়ে প্ৰতিবাদকাৰীৰ ওপৰত জঁপিয়াই পৰাৰ অভিযোগ উঠিছে।

প্ৰতিবাদকাৰীসকলে কৰা অভিযোগ অনুসৰি আৰক্ষীয়ে তেওঁলোকক প্ৰতিবাদ স্থগিত ৰাখিবৰ বাবে কোনোধৰণৰ আগজাননী নিদিয়াকৈ বৰ্বৰভাৱে তেওঁলোকৰ ওপৰত জঁপিয়াই পৰিছিল।

ইয়াৰ বিপৰীতে আৰক্ষীয়ে কৰা অভিযোগ অনুসৰি প্ৰতিবাদকাৰীসকলে আৰক্ষীলৈ শিল তথা ক’ল ড্ৰিংকছৰ বটল নিক্ষেপ কৰিছিল।

আৰক্ষীৰ লাঠীচালনাৰ ফলত প্ৰায় ১৫গৰাকী প্ৰতিবাদকাৰী আঘাতপ্ৰাপ্ত হয় আৰু তেওঁলোকক কমাৰ্চ পইণ্টতে থকা এখন ফাৰ্মাচিত চিকিৎসাৰ ব্যৱস্থা কৰোৱা হয়।

প্ৰতিবাদকাৰীসকলৰ দাবী যে তেওঁলোকে ন্যায় লাগে বুলি চিঞৰি সম্পূৰ্ণৰূপে গণতান্ত্ৰিক প্ৰতিবাদ কৰিছিল। তেওঁলোকে বিয়লি ৪ বজাৰ পৰা ৭ বজালৈকে এই প্ৰতিবাদী কাৰ্য্যসূচী চলাই নিছিল। আনহাতে প্ৰতিবাদকাৰীসকলে নীলোৎপল দাস আৰু অভিজিৎ নাথ নামৰ যুৱক দুজনক ৬-৭ ঘণ্টা ধৰি উন্মত্ত লোকসকলে প্ৰহাৰ কৰি আছিল বুলিও অভিযোগ তোলে। তেওঁলোকে এনেকুৱা জঘন্যভাৱে হত্যা কৰা ঘটনাটো কোনোপধ্যে মানি ল’ব নোৱাৰে বুলি উল্লেখ কৰে।

আনহাতে গুৱাহাটীৰ লগতে ৰাজ্যখনৰ বিভিন্ন প্ৰান্তত বিভিন্ন দল-সংগঠনে এই জঘন্য হত্যাকাণ্ডটোৰ বিৰুদ্ধে আজি প্ৰতিবাদ সাব্যস্ত কৰে। ইয়াৰ মাজতে এচাম প্ৰতিবাদকাৰীয়ে সাম্প্ৰদায়িক শ্ল’গান দিয়াও দেখা যায়। কিছুমান উদণ্ড, অপৈণত প্ৰতিদাবকাৰীক গোটেই কাৰ্বি সম্প্ৰদায়ৰ বিৰুদ্ধে বিদ্বেষপূৰ্ণ মন্তব্য দিয়াও দেখা যায়। ।

উল্লেখযোগ্য যে আৰক্ষীয়ে ইতিমধ্যে এই হত্যাকাণ্ডৰ সৈতে জড়িত ১৬জন লোকক গ্ৰেপ্তাৰ কৰিছে।