চিকিৎসক বিক্ষোভ! শিলচৰ চিকিৎসা মহাবিদ্যালয়লৈ ঢাপলি স্বাস্থ্য মন্ত্ৰী হিমন্ত বিশ্বৰ

শিলচৰ চিকিৎসা মহাবিদ্যালয়ত আজি ২৪ জুলাইত চিকিৎসক-ছাত্ৰ বিক্ষোভৰ পিছত মহাবিদ্যালয়খনলৈ ঢাপলি মেলিছে স্বাস্থ্য মন্ত্ৰী ড০ হিমন্ত বিশ্ব শৰ্মা।

সন্ধিয়া প্ৰায় ৮ বজাত চিকিৎসালয়খনত গৈ উপস্থিত হোৱা স্বাস্থ্য মন্ত্ৰীজনে চিকিৎসা মহাবিদ্যালয়খনৰ চিকিৎসক আৰু ছাত্ৰ-ছাত্ৰীৰ সৈতে আলোচনাত মিলিত হয়।

শৰ্মাৰ সৈতে শিলচৰৰ প্ৰাক্তন বিধায়ক বিমলাংশু ৰয়ৰ পুত্ৰ তথা অসম বিজেপিৰ মুখপাত্ৰ ডাঃ ৰাজদীপ ৰয়ো চিকিৎসালয়খনলৈ গৈছিল বুলি জানিব পৰা গৈছে।

বিজেপিয়ে ২৪ ঘণ্টাই বিজুলী যোগানৰ নিৰ্বাচনী প্ৰতিশ্ৰুতিৰে শাসনলৈ অহাৰ পিছত শাসনত খোদ শিলচৰ চিকিৎসা মহাবিদ্যালয়তে বিজুলী নথকা অৱস্থাত এগৰাকী ৰোগীৰ মৃত্যুক লৈ সোমবাৰে হোৱা অপ্ৰীতিকৰ পৰিস্থিতিৰ পিছত আজি কণিষ্ঠ চিকিৎসকসকলে নিৰাপত্তা বিচাৰি তীব্ৰ প্ৰতিবাদ কৰিছিল।

মহাবিদ্যালয়খনৰ আই চি য়ুত কালি ২৩ জুলাইৰ সন্ধিয়া ৪০ মিনিট সময় ধৰি নাছিল বিজুলী যোগান। সোমবাৰে চিকিৎসা মহাবিদ্যালয়খনত শিলচৰৰ মধুৰবন্দৰ ফাজু মিঞা লস্কৰ নামৰ এগৰাকী ৬০ বছৰীয়া ব্যক্তিগৰাকীৰ মৃত্যুক লৈ চিকিৎসকৰ ওপৰত হোৱা আক্ৰমণ আৰু আজি চিকিৎসকৰ প্ৰতিবাদে এই ভয়ংকৰ ঘটনা পোহৰলৈ আনিছে।

শিলচৰ চিকিৎসা মহাবিদ্যালয় ছাত্ৰ সন্থাৰ সভাপতি জিয়াউৰ ৰহমানে নৰ্থ ইষ্ট নাও-ক এই কথা জানিবলৈ দিয়ে।

‘তেতিয়া সময় সন্ধিয়া ৫.৩০ মান বাজিছিল। সেইখিনি সময়ত প্ৰায় ৪০ মিনিট ধৰি আই চি ইউত কাৰেন্ট নাছিল,’ নৰ্থ ইষ্ট নাও-ক জনাই ডাঃ ৰহমানে।

চিকিৎসকজনে লগতে জনাই যে বিজুলী যোগান নথকা বাবে ৰোগীজনৰ মৃত্যু হোৱা নাছিল আৰু তেওঁক বচাবলৈ জ্যেষ্ঠ হৃদ শল্য বিশেষজ্ঞ ডাঃ আহমেদ চৌধুৰীকে ধৰি চিকিৎসকৰ দলটোৱে আপ্ৰাণ চেষ্টা কৰিছিল।

‘বিজুলী সৰবৰাহ বন্ধ থকাৰ বাবে ৰোগীজন ঢুকুৱা নাই। কিন্তু ৰোগীজন ঢুকুৱাৰ সময়ত বিজুলী নাছিল। বিজুলী নাথাকিলেও আই চি ইউৰ গোটেই প্ৰ্ৰক্ৰিয়াবিলাক চলিয়ে আছিল, মাত্ৰ মনিটৰটো বন্ধ আছিল। যাৰ বাবে ৰোগীৰ আত্মীয়ই কথাটো মানি লোৱা নাছিল,’ মন্তব্য ডাঃ ৰহমানৰ।

বিজুলী সৰবৰাহ বন্ধ থকাৰ বাবেই ৰোগীজনৰ মৃত্যু ঘটা বুলি ধৰি লৈ ৰোগীজনৰ পৰিয়ালৰ লোকে পিছত চিকিৎসালয়খন লণ্ড-ভণ্ড কৰাৰ লগতে চিকিৎসককো আক্ৰমণ কৰিছিল।