চৰকাৰী ধনৰ অপচয় : পাৰ্বত্য স্বায়ত্ত শাসিত পৰিষদৰ স্বচ্ছতাক লৈ প্ৰশ্ন আৰটিআই কৰ্মী জুৱেলৰ

‘বিজেপি শাসিত উত্তৰ কাছাৰ পাৰ্বত্য স্বায়ত্ত শাসিত পৰিষদৰ সামগ্ৰিক কাম কাজৰ লগতে দেব’লাল গাৰ্লচা নেৰ্তৃত্বাধীন স্বায়ত্ত শাসিত পৰিষদত চৰকাৰী পূঁজিৰ অপব্যৱহাৰ হৈছে’। বৃহস্পতিবাৰে হাফলঙত এক সংবাদমেল সম্বোধন কৰি আৰটিআই কৰ্মী জুৱেল আৰু সমাজকৰ্মী চিত্মিনথাঙ খংছাইয়ে এই গুৰুতৰ অভিযোগ তথা প্ৰশ্ন উত্থাপন কৰে।

এই অভিযোগৰ আঁত ধৰি তেওঁলোকে কয় যে পৰিষদৰ সাধাৰণ কৰ্মচাৰী সকলৰ বাকি থকা দৰমহা মোকলাই দিয়াৰ কাৰনে ৰাজ্য চৰকাৰে অলপতে পৰিষদক ২৫ কোটি টকাৰ বিশেষ আৰ্থিক অনুদান আগবঢ়াইছিল। পাৰ্বত্য পৰিষদে তাৰ পৰা পোন্ধৰ কোটি দৰমহাত ব্যয় কৰিছে আৰু অৱশিষ্ট দহ কোটি টকা উন্নয়নৰ কামত ব্যয় কৰা বুলি আৰটিআই যোগেদি পৰিষদৰ অৰ্থ বিভাগৰ সচিবে জানিবলৈ দিয়ে।

কিন্তু লক্ষ্যণীয়ভাৱে ক’ত আৰু কি কামত এই বৃহৎ ধনৰাশি ব্যয় কৰা হয় বুলি আবেদন জনোৱাত উত্তৰত মাত্ৰ তেত্ৰিশ লাখ ব্যয়েৰে হাফলং গড়কাপ্তানী বিভাগৰ এখন এক্সাভেটৰ (জেচিবি) ক্ৰয় কৰা হৈছে বুলি জানিবলৈ দিয়া হয়। কিন্তু বাকী ৯ কোটি ৬৭ লাখ টকা ক’ত ব্যয় কৰা হৈছে তাৰ হিচাপ দিব পৰা নাই।

উল্লেখ্য যে চলতি বছৰৰ যোৱা ২৯ মে’ত পৰিষদৰ প্ৰধান সচিবৰ উদ্দেশ্যে এই ধনৰাশি ক’ত ব্যয় হ’ল জনাৰ উদ্দেশ্যে এখন আবেদন পত্ৰ জমা দিয়া হৈছিল। আৰু পোন্ধৰ দিন পাছত অৰ্থ্যাৎ ১৬ জুনত এখন আধৰুৱা প্ৰত্যুত্তৰ আহে। ইয়াৰ পাছতে বুধবাৰে পৰিষদৰ অৰ্থ বিভাগৰ ফালৰ পৰা চুড়ান্ত প্ৰত্যুত্তৰ আহে যদিও কিন্তু তাত ৯ কৌটি ৬৭ লাখৰ হিচাপ নাই।

এই সন্দৰ্ভত জুৱেলে উদ্বিগ্নতা প্ৰকাশ কৰি কয় যে বিজেপি দলে আৰ্থিক লেনদেনৰ ক্ষেত্ৰত ব্যাপক অৰাজকতাৰ সৃষ্টি কৰা পৰিলক্ষিত হৈছে।

আনহাতে সমাজকৰ্মী চিত্মিনথাঙে কয় যে প্ৰথমবাৰৰ বাবে দৰমহাৰ তহবিল কৰ্তন কৰি পৰিষদে উন্নয়নৰ কাৰনে ধন ব্যয় কৰিছে। যি আটাইতকৈ দুৰ্ভাগ্যজনক বিষয়। কিয়নো গড়কাপ্তানী বিভাগ ৰাজ্য চৰকাৰৰ অধীনস্থ এটা বিয়াগোম বিভাগ। য’ত মেচিন আদি ক্ৰয় কৰাৰ কাৰণে পৃথক বাজেট থাকে। ইয়াৰ জৰিয়তে প্ৰমাণ হয় যে পৰিষদত কেনেদৰে চলি আছে ব্যাপক বিত্তীয় অনিয়ম।

উল্লেখ্য যে দুয়োগৰাকী আৰটিআই তথা সমাজকৰ্মীয়ে অনাগত দিনত এই ক্ষেত্ৰত ৰাইজৰ সম্পূৰ্ণ সহায় সহযোগিতা বিচাৰিছে।