জনসচেতনতা সৃষ্টিৰ ক্ষেত্ৰত সংবাদমাধ্যমে গুৰুত্বপূৰ্ণ ভূমিকা গ্ৰহণ কৰি আহিছে : মুখ্য মন্ত্ৰী
‘এখন সমাজ তথা ৰাষ্ট্ৰৰ উল্লেখযোগ্য পৰিৱৰ্তনৰ ক্ষেত্ৰত সংবাদ মাধ্যমৰ গুৰুত্বপূৰ্ণ ভূমিকা আছে। মানুহৰ লগত মানুহৰ সদ্ভাৱনা, আন্তৰিকতা গঢ়াৰ জৰিয়তে এখন সুস্থ-সবল সমাজ গঢ় দিয়াৰ ক্ষেত্ৰটো সংবাদ মাধ্যমে যি ভূমিকা গ্ৰহণ কৰি আহিছে ভৱিষ্যতেও তেনেকুৱা মানসিকতাৰে আগবাঢ়িব লাগিব।’ দেওবাৰে আছাম ট্ৰিব্ৰিউন এমপ্লইজ ইউনিয়নৰ হীৰক জয়ন্তী উদযাপন উপলক্ষে আয়োজিত সভাত ভাষণ প্ৰদান কৰি মুখ্য মন্ত্ৰী গৰাকীয়ে এনেদৰে কয়।
গণতন্ত্ৰৰ চাৰিটা স্তম্ভৰ ভিতৰত সংবাদ মাধ্যমে জনসচেতনতা সৃষ্টিৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰি আহিছে বুলি উল্লেখ কৰি মুখ্য মন্ত্ৰী সোণোৱালে সংবাদ কৰ্মী আৰু সংবাদ মাধ্যমৰ লগত জড়িত লোকসকলৰ বাবে ৰাজ্য চৰকাৰে বিভিন্ন পদক্ষেপ গ্ৰহণ কৰিব বুলি কয়।
আছাম ট্ৰিবিউন কাকত গোষ্ঠীৰ প্ৰতিষ্ঠাপক সিংহ পুৰুষ ৰাধা গোবিন্দ বৰুৱাৰ প্ৰতি শ্ৰদ্ধা জ্ঞাপন কৰি মুখ্য মন্ত্ৰী গৰাকীয়ে কয় যে সমাজ আৰু ৰাষ্ট্ৰ নিমাৰ্ণত উল্লেখযোগ্য ভূমিকা গ্ৰহণ কৰা এই মহান ব্যক্তি গৰাকীৰ আদৰ্শৰে বৰ্তমানৰ নতুন প্ৰজন্ম আগুৱাই যাব লাগিব।
সভাত মুখ্য মন্ত্ৰী গৰাকীয়ে পদ্মশ্ৰী বঁটা প্ৰাপক প্ৰফুল্ল গোবিন্দ বৰুৱাকো অভিনন্দন জনাই কয় যে একবিংশ শতিকাৰ বিজ্ঞানৰ এই প্ৰতিযোগিতামুখী বাতাবৰণত যোগাযোগ আৰু যাতায়াত অবিহনে কোনো ৰাষ্ট্ৰই প্ৰগতি লাভ কৰিব নোৱাৰে।
আছাম ট্ৰিব্ৰিউন এমপ্লইজ ইউনিয়নৰ সভাপতি শিৱ প্ৰদান ডেকাৰ পৌৰোহিত্যত অনুষ্ঠিত সভাত ‘দ্য হিন্দু’ৰ ৰুৰেল এফেয়াৰ্ছৰ প্ৰাক্তন সম্পাদক পি চাইনাথ, অল ইণ্ডিয়া নিউজ পেপাৰ এমপ্লইজ ফেডাৰেশ্যনৰ কোষাধ্যক্ষ ৰূপচান্দ, মুখ্য মন্ত্ৰীৰ আইন উপদেষ্টা শান্তনু ভৰালী প্ৰমুখ্যে সংবাদ মাধ্যমৰ লগত জড়িত সংবাদকৰ্মীৰ লগতে বহু গণ্য-মান্য ব্যক্তি উপস্থিত থাকে।