ডকমকা কাণ্ডৰ আঁৰত অপশক্তি জড়িতৰ আশংকা বিশিষ্ট বুদ্ধিজীৱী ড০ হীৰেন গোহাঁইৰ
কাৰ্বি আংলঙৰ ডকমকাত শেহতীয়াভাৱে সংঘটিত বৰ্বৰ কাণ্ডক লৈ ৰাজ্যৰ চৌদিশে অব্যাহত আছে ক্ষোভ আৰু প্ৰতিবাদৰ জুই।ইতিমধ্যে বিভিন্নজনে ঘটনাটোক ভিন্ন দৃষ্টিকোণেৰে পৰ্যালোচনা কৰি আগবঢ়াইছে প্ৰতিক্ৰিয়া।
ইয়াৰ মাজতে শেহতীয়াভাৱে বিশিষ্ট বুদ্ধীজীৱী ড০ হীৰেন গোহাঁয়ে ডকমকা কাণ্ডক লৈ তীব্ৰ প্ৰতিক্ৰিয়া প্ৰকাশ কৰি কয়— ‘দেখাত সোপাধৰাক লৈ এই ঘটনা ঘটিলেও ইয়াৰ অন্তৰালত গভীৰ ষড়যন্ত্ৰৰ আশংকা আছে। সোপাধৰা আহিছে বুলি বহু দিনৰ পৰা প্ৰচাৰ কৰা হৈছে। সেয়েহে কুটিল অপশক্তি ইয়াৰ অন্তৰালত থাকিব পাৰে।’
আনহাতে এইক্ষেত্ৰত ৰাইজক বিচাৰ- বিবেচনা কৰি হঠকাৰী সিদ্ধান্ত ন’লবলৈ আহ্বান জনাই বিশিষ্ট বুদ্ধিজীৱী গৰাকীয়ে।
গোহাঁয়ে লগতে কয় যে চৰকাৰে ৰাইজৰ বেদনা–ক্ষোভক গুৰুত্ব দিয়ক আৰু বেদনাক সন্মান জনাই পদক্ষেপ লওক অন্যথা অসম বিৰোধী শক্তিয়ে সুযোগ ল’ব।’
প্ৰসংগক্ৰমে উল্লেখযোগ্য যে কালি কৃষক নেতা অখিল গগৈয়ে ডকমকা কাণ্ডৰ আঁৰত বিজেপি- আৰএছএছ জড়িত থকাৰ সন্দেহ প্ৰকাশ কৰিছিল। ইয়াকে লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হোৱাৰ সময়তে বিশিষ্ট বুদ্ধিজীৱী ড০ হীৰেন গোহাঁইৰ মন্তব্য যথেষ্ট তাৎপৰ্যপূৰ্ণ।
উল্লেখযোগ্য যে শেহতীয়াভাৱে কাৰ্বি আংলঙৰ ডকমকাত সোপাধৰাৰ সন্দেহত নীলোৎপল আৰু অভিজিৎ নামৰ দুজনক মৰিয়াই হত্যা কৰিছিল উন্মত্ত ৰাইজে।