ডিমৌত নীলোৎপল আৰু অভিজিতৰ সোঁৱৰণত বন্তি প্ৰজ্বলন

দেওবাৰে সন্ধিয়া ডিমৌ চাৰিআলিতো বন্তি জ্বলাই নীলোৎপল দাস আৰু অভিজিৎ নাথলৈ অসমীয়া যুৱ মঞ্চই শ্ৰদ্ধাঞ্জলি জ্ঞাপন কৰে। যুব মঞ্চৰ সভাপতি হোমেন গগৈয়ে আঁত ধৰা অনুষ্ঠানটিত আটাছুৰ শিৱসাগৰ মহকুমা সম্পাদক সন্দীপ গগৈ, ক্ৰীড়াবিদ মঞ্জুৰ আলি, সাতোঁৰ সন্থাৰ চন্দন ফুকন, ডিমৌৰ আটাছুৰ সুমিত সন্দিকৈ, প্ৰতিদিন কাকতৰ উমেশ চেতিয়া, নিয়মীয়া বাৰ্তাৰ বীৰেণ কলিতাকে ধৰি উপস্থিত সকলোৱে শ্ৰদ্ধাঞ্জলি জনাই এই বৰ্বৰ হত্যাকাণ্ডৰ গৰিহনা দি দোষী সকলক উপযুক্ত শাস্তি দিবৰ বাবে দাৱী জনায়।

উপস্থিত সকলোৱে ৰাইজক শান্তি সম্প্ৰীতি অটুট ৰাখি আইন হাতত তুলি নল’বলৈ আহ্বান জনায়। ৰাজ‍্যত যাতে পুনৰাই এনে ঘটনা নঘটে তাৰ বাবে সকলোৱে প্ৰাৰ্থনা জনায়।

কাৰ্বি আংলং জিলাৰ ডকমকাৰ পাণজুৰিত সংঘটিত দুই অসমীয়া নিৰীহ যুৱ শিল্পীৰ নৃশংস হত্যাকাণ্ডৰ ঘটনাক কেন্দ্ৰ কৰি ৰাজ্যজুৰি বিৰাজ কৰিছে শোকৰ বন্যা। দোষীৰ শাস্তিৰ বাবে ঠায়ে ঠায়ে সমদল, বন্তি প্ৰজ্বলন আদি অনুষ্ঠান অনুষ্ঠিত হৈ আছে।

ডকমকাত সংঘটিত এই নাৰকীয় কাণ্ডক লৈ ইতিমধ্যে সমগ্ৰ ৰাজ্যখনৰ লগতে ৰাষ্ট্ৰীয় পৰ্যায়তো প্ৰতিক্ৰিয়াৰ সৃষ্টি হৈছে।