ডিমৌত সফলভাৱে সম্পন্ন প্ৰথমটো বেদনাহীন প্ৰসৱ অস্ত্ৰোপচাৰ
বৰ্তমান বিজ্ঞানৰ যুগত মানুহে অসম্ভৱকো সম্ভৱ কৰি তুলিছে। এই দিশত পিছ পৰি ৰোৱা নাই চিকিৎসা ক্ষেত্ৰখনো। বেদনাহীন প্ৰসৱ আধুনিক চিকিৎসাৰ এক নৱতম অধ্যায়। এই বেদনাহীন প্ৰসৱ সকলো মাতৃৰ এক অধিকাৰ। বিশেষকৈ অসমৰ গ্ৰাম্য চিকিৎসালয়সমূহত বিভিন্ন কাৰণত এই প্ৰক্ৰিয়া ব্যৱহাৰ কৰিব পৰা ব্যৱস্থা নাথাকে।
সাধাৰণতে পৰ্যাপ্ত এনেছথেছিয়াৰ চিকিৎসক, স্ত্ৰীৰোগ বিশেষজ্ঞ, নাৰ্চ আৰু আনুসংগিক লাগতিয়াল সা-সৰঞ্জাম, দৰৱ আদিৰ অভাৱ ইত্যাদি কাৰণৰ বাবে এই প্ৰক্ৰিয়া সম্ভৱ হৈ নুঠেগৈ।
শিৱসাগৰ জিলাৰ ডিমৌ চিকিৎসালয়ত শুকুৰবাৰে এই সকলোবোৰ বাধা নেওচি মাইনা গগৈ নামৰ প্ৰসূতি গৰাকীয়ে বেদনাহীনভাৱে এটি সুস্থ শিশুৰ জন্ম দিয়ে। উল্লেখযোগ্য যে সমগ্ৰ ভাৰতৰ ভিতৰত এখন সৰু গ্ৰাম্য চিকিৎসালয়ত বেদনাহীন প্ৰসৱৰ এইয়া সম্ভৱত: একমাত্ৰ উদাহৰণ।
ডিমৌ চিকিৎসালয়ৰ সংজ্ঞানাশক বিশেষজ্ঞ ডাঃ সুৰজিত গিৰি, প্ৰসূতি বিশেষজ্ঞ ডাঃ সীমান্তজ্যোতি টায়ে আৰু নাৰ্চৰ সহায়ত এই বেদনাহীনহীন প্ৰসৱ সফল হৈ উঠে। তেওঁলোকৰ মতে এইয়া এক প্ৰচেষ্টা মাত্ৰ, সম্পূৰ্ণ ৰূপে কাৰ্যকৰী হ’বলৈ সকলোৱে একেলগে কাম কৰিব লাগিব, তেতিয়াহে বেদনাহীন প্ৰসৱ গ্ৰাম্য চিকিৎসালয়ত এক বাস্তৱলৈ ৰূপান্তৰিত হ’ৱ। চিকিৎসালয়খনৰ এনে সফল প্ৰচেষ্টাৰ বাবে স্থানীয় ৰাইজে চিকিৎসকদ্বয়ক প্ৰশংসা কৰে।