তৃতীয় ৰাষ্ট্ৰীয় যুৱ সন্মিলন উদ্বোধন মুখ্য মন্ত্ৰী সৰ্বানন্দ সোণোৱালৰ

‘দেশৰ কৃষি খণ্ডৰ উন্নয়নৰ বাবে ব্যাপক কৃষি গৱেষণাৰ প্ৰয়োজন আছে। ৰাজ্যখনৰ কৃষি খণ্ডৰ সমতাপূৰ্ণ বিকাশ সাধন কৰাৰ বাবে ছাত্ৰ-ছাত্ৰীসকলক গৱেষণাৰ প্ৰতি অধিক আকৰ্ষিত কৰাৰ বাবে অসম কৃষি বিশ্ববিদ্যালয়ে অগ্ৰণী ভূমিকা গ্ৰহণ কৰিব লাগিব।’ আজি কৃষি উদ্যমিতা আৰু নিয়োগৰ সুযোগ সৃষ্টিৰ বাবে কৃষি খণ্ডৰ পৰিৱৰ্তনঃ যুৱ সমাজৰ দৃষ্টিভংগী শীৰ্ষক তৃতীয় ৰাষ্ট্ৰীয় যুৱ সন্মিলন উদ্বোধন কৰি মুখ্য মন্ত্ৰী সৰ্বানন্দ সোণোৱালে এইদৰে কয়।

মুখ্য মন্ত্ৰী গৰাকীয়ে কয় যে কৃষিৰ প্ৰয়োজনীয় চাহিদা আৰু উন্নয়নৰ বাবে গৱেষণাই গুৰুত্বপূৰ্ণ ভূমিকা গ্ৰহণ কৰে আৰু আৰ্থনৈতিক উন্নয়নৰ ক্ষেত্ৰত কৃষিক এটা বহুমুখী দিশ হিচাপে চিহ্নিত কৰিব লাগিব।

মুখ্য মন্ত্ৰী গৰাকীয়ে কয় যে, ‘সমগ্ৰ দেশৰ পৰা অহা কৃষি বিজ্ঞানৰ ছাত্ৰ-ছাত্ৰী, অধ্যাপক আৰু কৃষি বিজ্ঞানীৰ উপস্থিতিয়ে কৃষি খণ্ডৰ বিকাশত নতুন মাত্ৰা সংযোজন কৰিব। দেশখনৰ কৃষি খণ্ডৰ বিকাশৰ বাবে উপযুক্ত পথ প্ৰদৰ্শনৰ ক্ষেত্ৰত যোৰহাটত অনুষ্ঠিত তৃতীয় ৰাষ্ট্ৰীয় যুৱ সন্মিলনে নতুন দিশ মুকলি কৰিব।‘

কৃষি খণ্ডৰ বিকাশ সাধনৰ ওপৰত গুৰুত্ব আৰোপ কৰি মুখ্য মন্ত্ৰীৰ সমগ্ৰ গ্ৰাম্য উন্নয়ন যোজনাৰ জৰিয়তে ২০২২ চনৰ ভিতৰত কৃষকৰ উৎপাদন দুগুণলৈ বৃদ্ধি কৰাৰ বাবে পদক্ষেপ গ্ৰহণ কৰা হৈছে বুলিও মুখ্য মন্ত্ৰী গৰাকীয়ে কয়। লগতে তেওঁ ৰাজ্যখনৰ পাৰিপাৰ্শ্বিকতা অক্ষুণ্ণ ৰখা আৰু প্ৰাকৃতিক সৌন্দৰ্য অটুট ৰখাৰ বাবে ৰাজ্য চৰকাৰে ১০ কোটি গছ পুলি ৰোপণৰ বাবে সিদ্ধান্ত গ্ৰহণ কৰিছে বুলিও কয়।

আনহাতে অনুষ্ঠানৰ লগত সংগতি ৰাখি কৃষিৰ বিভিন্ন খণ্ডত পাৰদৰ্শিতা প্ৰদৰ্শন কৰা কেইবাগৰাকী ব্যক্তিলৈ মুখ্য মন্ত্ৰী গৰাকীয়ে পুৰস্কাৰ আগবঢ়ায়।

ভাৰতীয় কৃষি গৱেষণা পৰিষদ, অসম কৃষি বিশ্ববিদ্যালয়, অল ইণ্ডিয়া এগ্ৰিকালচাৰ ষ্টুডেণ্ট এছ’চিয়েচনৰ যৌথ উদ্যোগত আয়োজন কৰা এই সন্মিলনত সাংসদ কামাখ্যা প্ৰসাদ তাছা আৰু প্ৰদান বৰুৱা, বিধায়ক ঋতুপৰ্ণ বৰুৱা, অসম কৃ,ই বিশ্ব বিদ্যালয়ৰ উপাচাৰ্য ড০ কে এম বুজৰবৰুৱা, অল ইণ্ডিয়া এগ্ৰিকালচাৰ ষ্টুডেণ্ট এছ’চিয়েচনৰ উপদেষ্টা আৰ পি সিং, অল ইণ্ডিয়া এগ্ৰিকালচাৰ ষ্টুডেণ্ট এছ’চিয়েচনৰ সভানেত্ৰী ছনিকা প্ৰিয়দৰ্শনীকে ধৰি বহু গণ্যমান্য ব্যক্তি উপস্থিত থাকে।