ত্ৰিপুৰাত যোগী আদিত্যনাথৰ নিৰ্বাচনী প্ৰচাৰ অভিযান

আসন্ন ত্ৰিপুৰা বিধানসভা নিৰ্বাচনৰ বাবে দুদিনীয়া কাৰ্যসূচী লৈ ৰাজ্যখনত উপস্থিত হোৱা উত্তৰ প্ৰদেশৰ মুখ্য মন্ত্ৰী যোগী আদিত্যনাথে মঙলবাৰে উদয়পুৰৰ ত্ৰিপুৰেশ্বৰী মন্দিৰত পূজা আগবঢ়াই।

আনহাতে কুমাৰঘাট উচ্চ মাধ্যমিক বিদ্যালয়ত অনুষ্ঠিত এক জনসমাবেশক সম্বোধন কৰি উত্তৰ প্ৰদেশৰ মুখ্য মন্ত্ৰী গৰাকীয়ে ত্ৰিপুৰাৰ জনসাধাৰণক ৰাজ্যখনৰ পৰা বামপন্থী চৰকাৰক উৎখাত কৰিবলৈ আহ্বান জনাই কয় যে বামপন্থী চৰকাৰখনে নিজৰ শাসন কালত দুখীয়া লোকসকলক আত্মনিৰ্ভৰশীল হোৱাৰ কোনো সুবিধা নিদিলে।

উত্তৰ ত্ৰিপুৰা জিলাৰ ধৰ্মনগৰৰ অন্তৰ্গত পদ্মপুৰৰ গোৰখনাথ মন্দিৰত পূজা আগবঢ়োৱা পিছতে তেওঁ ত্ৰিপুৰাত নিৰ্বাচনী প্ৰচাৰ আৰম্ভ কৰে। উল্লেখযোগ্য যে যোগী আদিত্যনাথ উত্তৰ প্ৰদেশৰ গোৰখপুৰত অৱস্থিত গোৰখনাথ মন্দিৰৰ প্ৰধান পূজাৰি।

বিজেপি যদি ত্ৰিপুৰাত ক্ষমতালৈ আহে তেন্তে ই কেন্দ্ৰৰ সকলো কল্যাণ আঁচনিয়ে যাতে দুখীয়া লোকসকলক ঢুকি পায় তাক নিশ্চিত কৰিব বুলি তেওঁ উল্লেখ কৰে।

ত্ৰিপুৰা বিধানসভা নিৰ্বাচনৰ বাবে বিজেপিৰ হৈ প্ৰচাৰ অভিযান চলাবলৈ অহা আদিত্যনাথে শাসনাধিস্থ বামচৰকাৰখনে যোৱা ২৫ বছৰৰ শাসনকালত কেন্দ্ৰৰ বিভিন্ন আঁচনিৰ সুফল আদায় কৰাত বিফল হৈছে বুলি চৰকাৰখনক সমালোচনা কৰে।