ত্ৰিপুৰাৰ মন্ত্ৰী আৱাসৰ শৌচাগাৰত চি পি আই (এম)এ লুকুৱাই ৰাখিব পাৰে নৰকংকাল; ব্যৱহাৰৰ পূৰ্বে চাফা কৰাবলৈ অনুৰোধ সুনীল দেওধৰৰ
ত্ৰিপুৰাৰ মন্ত্ৰীসকলৰ শৌচালয়ৰ গাঁতত থাকিব পাৰে লুকুৱাই থোৱা নৰকংকাল! এই আশংকা প্ৰকাশ কৰি মন্ত্ৰীসকলে চৰকাৰী আৱাসসমূহত থাকিবলৈ লোৱাৰ আগতে সকলো আৱাসৰে শৌচাগাৰৰ গাঁতসমূহ পৰিস্কাৰ কৰি ল’বৰ বাবে নতুন মুখ্য মন্ত্ৰী বিপ্লব দেবক অনুৰোধ জনাইছে ত্ৰিপুৰাৰ দায়িত্ববাহী বিজেপি নেতা সুনীল দেওধৰে।
‘থাকিবলৈ লোৱাৰ আগতে মন্ত্ৰীসকলৰ সকলো আৱাসৰ শৌচাগাৰৰ গাঁতসমূহ পৰিস্কাৰ কৰি ল’বলৈ মই ত্ৰিপুৰাৰ নতুন মুখ্য মন্ত্ৰী বিপ্লব দেবক অনুৰোধ জনালো’ নিজৰ টুইটাৰ হেণ্ডলত যোৱা শুকুৰবাৰে এইদৰে লিখিছে দেওধৰে।
দেওধৰে একেটা টুইটটে লিখিছে যে ‘এইটো মনত পেলোৱা উচিত যে যোৱা ২০০৫ চনৰ ৪ জানুৱাৰিত মুখ্য মন্ত্ৰী মানিক চৰকাৰৰ শৌচাগাৰৰ গাঁতত এগৰাকী মহিলাৰ জঁকা পোৱা গৈছিল, কিন্তু গোচৰটো পৰিকল্পিতভাৱে দবাই ৰখা হ’ল।’
সংবাদ মাধ্যমত প্ৰকাশ পোৱা মতে সেই ঘটনাটো সন্দৰ্ভত তদন্ত কৰা হৈছিল যদিও তদন্ত প্ৰতিবেদন প্ৰকাশ কৰা হোৱা নাছিল।
আনহাতে নিউজ ১৮এ পৰিৱেশন কৰা বাতৰি অনুসৰি ঘটনাটো সন্দৰ্ভত ত্ৰিপুৰাৰ আৰক্ষী সঞ্চালকপ্ৰধান অখিল কুমাৰ শুক্লাক সোধাত তেওঁ ‘আৰক্ষীয়ে কোনো বিষয় গাপ দিয়া নাই’ বুলি জনায়।
আৰক্ষী সঞ্চালক প্ৰধানজনে কয় যে ৰাজনৈতিক দলৰ অভিযোগসমূহৰ আৰক্ষীয়ে তদন্ত কৰিব।
আনহাতে বিজেপি নেতাজনৰ এনে বিস্ফোৰক অভিযোগৰ প্ৰতিক্ৰিয়া কৰি ত্ৰিপুৰা চি পি আই (এম)ৰ মুখপত্ৰ গৌতম দাসে ‘তেওঁলোকে পৰীক্ষা কৰক। আমাৰ কোনো সমস্যা নাই’ বুলি মত প্ৰকাশ কৰিছে।