দ্বিতীয়- পঞ্চম স্থান দখল কৰি পাঠশালাৰ আনন্দৰাম বৰুৱা একাডেমীলৈ গৌৰৱ কঢ়িয়ালে অবিনাশ- নিবিড়ে

সদ্যঘোষিত হাইস্কুল- হাইমাদ্ৰাজা পৰীক্ষাৰ ফলাফলত সাফল্যৰ ধাৰা অব্যাহত ৰাখি পুনৰ উজলি উঠিবলৈ সক্ষম হ’ল পাঠশালাৰ আনন্দৰাম বৰুৱা একাডেমী। ঘোষিত ফলাফল অনুসৰি বিদ্যালয়খনৰ দুই ছাত্ৰ অবিনাশ কলিতা আৰু নিবিড় ডেকা ক্ৰমে দ্বিতীয়- পঞ্চম স্থান দখল কৰিবলৈ সক্ষম হয়।

উল্লেখযোগ্য যে সৰুৰে পৰা মেধাৰ পৰিচয় দি অহা অবিনাশ কলিতা আৰু নিবিড় ডেকাই আজি ঘোষিত হাইস্কুল শিক্ষান্ত পৰীক্ষাত ক্ৰমে দ্বিতীয় আৰু পঞ্চম স্থান লাভ কৰি বজালীলৈ গৌৰৱ কঢ়িয়াবলৈ সক্ষম হৈছে। ঘোষিত ফলাফল অনুযায়ী অবিনাশে লাভ কৰিছে মুঠ ৫৯২ নম্বৰ। নিবিড়ে লাভ কৰিছে ৫৮৯ নম্বৰ।

এই ফলাফল লাভৰ পাছতে উৎফুল্লিত হৈ পৰিছে একাডেমীখনৰ ৰেক্টৰ ড: ৰঞ্জিত ডেকা। ড: ডেকাই অবিনাশ কলিতা আৰু নিবিড় ডেকাৰ স্থান লাভত উৎফুল্লিত হোৱা বুলি মন্তব্য কৰি একাডেমীখনৰ সমূহ সফল ছাত্ৰ-ছাত্ৰীক শুভেচ্ছা জ্ঞাপন কৰে। শিক্ষক-শিক্ষয়িত্ৰীসকলৰ নিৰৱিচ্ছিন্ন প্ৰয়াসৰ বাবে এই ফলাফল সম্ভৱ হোৱা বুলি মন্তব্য কৰে ৰেক্টৰগৰাকীয়ে।

একাডেমীখনৰ এই সফলতাত আনন্দ প্ৰকাশ কৰিছে বজালীবাসীয়ে। এয়া সমগ্ৰ বজালীৰ বাবে আনন্দৰ ক্ষণ বুলি সকলোৱে মন্তব্য কৰিছে।