দৰঙত নবোদয় বিদ্যালয়ৰ মাণ্ডলিক বাস্কেটবল প্ৰতিযোগিতাৰ শুভাৰম্ভ

আজিৰে পৰা দৰং জিলাৰ উদমাৰীৰ জৱাহৰ নবোদয় বিদ্যালয় চৌহদত শ্বিলং মাণ্ডলিক বাস্কেটবল প্ৰতিযোগিতা (ল’ৰা-ছোৱালী)-২০১৮ আৰম্ভ হৈছে।

প্ৰতিযোগিতাখন ১৯ অনূৰ্ধ্ব, ১৭ অনূৰ্ধ্ব আৰু ১৪ অনূৰ্ধ্ব—এই তিনিটা শাখাত অনুষ্ঠিত হ’ব। প্ৰতিযোগিতাখন ছিকিমকে ধৰি  আঠটা ভিন্ন ভিন্ন গোটত ভাগ কৰা হৈছে।

১৯ অনূৰ্ধ্বৰ প্ৰথম দুখন আৰম্ভণি মেচত ল’ৰাৰ শাখাত কোহিমা গোটে কাচাৰ গোটক পৰাস্ত কৰিছিল। আনহাতে ছোৱালী শাখাত ঘৰুৱা দল দৰং গোটে কাচাৰ গোটক পৰাস্ত কৰিছিল।

ইয়াৰ পূৰ্বে দৰং জৱাহৰ নবোদয় বিদ্যালয়ৰ পি ৰাজেশ আৰু আন আন বিশিষ্ট অতিথিৰ উপস্থিতিত মুখ্য অতিথি হিচাপে উপস্থিত থকা দৰঙৰ জিলা উপায়ুক্ত অশোক কুমাৰ বৰ্মনে তিনিদিনীয়া প্ৰতিযোগিতাখনৰ উন্মোচন কৰিছিল।

মুখ্য অতিথিয়ে অংশগ্ৰহণকাৰী খেলুৱৈসকলৰ মাৰ্চ-পাষ্ট অভিনন্দন গ্ৰহণ কৰিছিল।

জ্যেষ্ঠ শিক্ষয়িত্ৰী দেৱীকা দত্তই অনুষ্ঠানটোৰ আঁত ধৰিছিল। এই অনুষ্ঠানত ছাত্ৰ-ছাত্ৰীসকলে আকৰ্ষণীয় সাংস্কৃতিক অনুষ্ঠান পৰিৱেশন কৰিছিল।

জৱাহৰ নবোদয় বিদ্যালয়ৰ কৰ্তৃপক্ষই আৰু ঘোষণা কৰিছে যে অহা মাহত ৰাজস্থানত অনুষ্ঠিত হ’বলগীয়া ৰাষ্ট্ৰীয় পৰ্যায়ৰ প্ৰতিযোগিতাত শ্বিলং মণ্ডলক প্ৰতিনিধিত্ব কৰিবলৈ প্ৰতিটো বয়স গোটৰ পৰা ৬গৰাকী খেলুৱৈক বাচনি কৰা হ’ব।