দৰঙত সক্ৰিয় বেংক হেকাৰ চক্ৰ, এজনক আটক

দৰঙত এটা বেংক হেকাৰ চক্ৰ সক্ৰিয় হৈ থকাৰ খবৰে জিলাখনৰ বিভিন্ন বেংকত ধন জমা ৰখা সাধাৰণ গ্ৰাহকসকলৰ মাজত উদ্বেগৰ সৃষ্টি কৰিছে।

প্ৰাপ্ত তথ্য মতে আজি দৰং আৰক্ষীয়ে ছহৰ আলী নামৰ বেংক হেকাৰ চক্ৰৰ এগৰাকী সদস্য আটক কৰে।

আটকাধীন ছহৰ আলী দলগাওঁ খইৰাকতা গাঁৱৰ ওমৰ আলীৰ পুত্ৰ।

লোকজনক সোনাৰি কাছমাৰি গাঁৱৰ হফিজুল ইছলাম নামৰ এজন ব্যক্তিয়ে কিছুদিন আগতে দলগাওঁ আৰক্ষী থানাত দাখিল কৰা এক গোচৰৰ ভিত্তিত আটক কৰা হয়।

উল্লেখ্য যে হফিজুল ইছলামে দলগাওঁ এছ বি আই শাখাত থকা তেওঁৰ একাউন্টৰ পৰা ৫,০০০ টকা ওলাই যোৱা বুলি এটা এছ এম এছ লাভ কৰিছিল। এছ এম এছটো লাভ কৰিয়ে তেওঁ বেংকত গৈ খবৰ কৰাত উক্ত ধনৰাশি হেকিঙৰ জৰিয়তে খইৰাকতাৰ ছহৰ আলী উলিয়াই নিয়া বুলি জানিব পাৰে।

এই সম্পৰ্কে আৰক্ষীক জনোৱাত আৰক্ষীয়ে এটা গোচৰ ৰুজু কৰি অভিযুক্ত লোকজনক আটক কৰে। আৰক্ষীৰ জেৰাত লোকজনে নিজৰ অপৰাধ স্বীকাৰ কৰে বুলি আৰক্ষীয়ে জানিবলৈ দিয়ে।

আনহাতে চক্ৰটোৰ বাকী সদস্যসকলক কৰায়ক্ত কৰাৰ উদ্দেশ্যে অভিযান আৰম্ভ কৰিছে জানিবলৈ দিয়ে।