ধুমুহাই বিস্তৰ ক্ষতিসাধন কৰিলে বঙাইগাঁও আৰু বৰপেটা জিলাৰ বিভিন্ন অঞ্চল

সোমবাৰে নিশা অহা বতাহ-ধুমুহাৰ ফলত নামনি অসমৰ বিভিন্ন প্ৰান্তত বিস্তৰ ক্ষতিসাধন হোৱা দেখা যায়। ঠিক সেইদৰে বঙাইগাঁও আৰু বৰপেটা জিলাৰ বিভিন্ন অঞ্চলত ধুমুহাই তাণ্ডৱ চলোৱা পৰিলক্ষিত হয়।

বঙাইগাঁও জিলাৰ মানিকপুৰ আৰক্ষী থানাৰ অন্তৰ্গত আৱাদি, নোৱাগাঁও, পূৱ নোৱাগাঁও, কোকিলা আৰক্ষী থানাৰ অন্তৰ্গত শৌলমাৰী, চাকলা, আদি গাঁৱতো ৰাতি হৈ যোৱা ধুমুহাই ব্যাপক ক্ষতি সাধন কৰে।ধুমুহাৰ ফলত উক্ত অঞ্চলৰ বহু পৰিয়ালৰ ঘৰ-দুৱাৰ ক্ষতি সাধন হোৱা পৰিলক্ষিত হয়।

আনহাতে কোকিলাৰ নিকটৱৰ্তী তথা বৰপেটা জিলাৰ হালধীয়া গাওঁতো ধুমুহাই তাণ্ডৱ চলায়। জানিব পৰা অনুসৰি ধুমুহাৰ ফলত বহু ঘৰৰ ওপৰত প্ৰকাণ্ড-প্ৰকাণ্ড গছ বাগৰি পৰাত বহু পৰিয়ালৰে ঘৰ-দুৱাৰৰ ক্ষতি সাধন হয়।ধুমুহাৰ ফলত  বহু পৰিয়ালৰ সম্পত্তিৰ বিনষ্ট হৈছে যদিও এতিয়ালৈ কোনো লোকৰে অনিষ্ট হোৱাৰ খবৰ অহা নাই।

ইয়াৰ উপৰি কোনো কোনো অঞ্চলত বিদ্যুতৰ খুঁটাৰ লগতে গছ-গছনি উভালি পেলোৱাৰ ফলত লোকসকল নানা সমস্যাত পৰা বুলিও আমালৈ খবৰ আহিছে। উল্লেখ্য যে এই ধুমুহাৰ ফলত অঞ্চলটোৰ খেতি-পথাৰৰ লগতে যথেষ্ট পৰিমানে শাক-পাচলিৰ খেতিৰ অনিষ্ট হয় বুলি জনা গৈছে।