নাগালেণ্ডৰ উন্নয়নৰ স্বাৰ্থত বিজেপিক ভোট দিয়ক: নিৰ্মলা সীতাৰমন

সকলো শ্ৰেণীৰ লোকে উপযুক্ত চাকৰি পাব আৰু ৰাজ্যখনত বিনিয়োগো আহিব। শুকুৰবাৰে নাগালেণ্ডৰ কহিমাত ৰাজ্যিক বিজেপিয়ে আয়োজিত নিৰ্বাচনী ঘোষণা পত্ৰ উন্মোচনী অনুষ্ঠানত কেন্দ্ৰীয় প্ৰতিৰক্ষা মন্ত্ৰী নিৰ্মলা সীতাৰমনে এনেদৰে কোৱা দেখা যায়। তেওঁ লগতে কয় যে ৰাজ্যখনৰ সৰ্বাংগীণ উন্নয়নৰ স্বাৰ্থত ৰাজ্যবাসীয়ে বিজেপিক শাসনত অধিষ্ঠিত কৰাটো প্ৰয়োজনীয়।

মন্ত্ৰী সীতাৰমনে সাম্প্ৰতিক পৰিস্থিতি সন্দৰ্ভত কয় যে ৰাজ্যখনত ৰাজনৈতিক স্থিৰতা আৰু উন্নয়নৰ স্বাৰ্থত নিৰ্বাচন অনুষ্ঠিত হোৱাটো অতিকৈ গুৰুত্বপূৰ্ণ।

উল্লেখ্য যে সীতাৰমনে ঘোষণা পত্ৰ উন্মোচনী অনুষ্ঠানত কংগ্ৰেছক তীব্ৰ সমালোচনা কৰা দেখা যায়। তেওঁ কয় যে কংগ্ৰেছে ভোট আহৰণৰ বাবে জাতি-ধৰ্মৰ মাজত ভেদভাব সৃষ্টি কৰি অতি নিকৃষ্ট ৰাজনীতি কৰে। কিন্তু বিজেপি এনে ৰাজনীতিৰ পৰা সদায় আঁতৰত থাকে।

উন্নতমানৰ প্ৰযুক্তিৰ জৰিয়তে ৰাজ্যখনৰ যোগাযোগ ব্যৱস্থা ত্বৰাণ্বিত কৰি তথা স্থানীয় হস্ত নিৰ্মিত সামগ্ৰী সমূহৰ বাবে এখন উপযুক্ত বজাৰ গঢ়ি তোলাৰ ক্ষেত্ৰত জোৰ দিয়ে কেন্দ্ৰীয় মন্ত্ৰী গৰাকীয়ে।

তেওঁ লগতে কয় যে ৰাজ্যৰ প্ৰত্যেক জিলাতে এই সকলোবোৰ আহৰণ কৰিব পৰা যাব একমাত্ৰ কেন্দ্ৰীয় আঁচনি উৰানৰ জৰিয়তেহে।

আনহাতে নাগালেণ্ডত বিজেপিৰ হৈ নিৰ্বাচনী দায়িত্বত থকা কেন্দ্ৰীয় গৃহৰাজ্য মন্ত্ৰী কিৰেন ৰিজিজুৱে কয় যে ৰাজ্যখনত বিজেপিৰ হৈ নিৰ্বাচনী প্ৰচাৰৰ বাবে প্ৰধান মন্ত্ৰী নৰেন্দ্ৰ মোদী, ৰাষ্ট্ৰীয় অধ্যক্ষ অমিত শ্বাহৰ লগতে দেশৰ আগশাৰীৰ বিভিন্ন দলীয় নেতাই জনসভাত অংশগ্ৰহণ কৰিব।

নাগালেণ্ড ৰাজ্যিক বিজেপিয়ে জনোৱা অনুসৰি ২০ ফেব্ৰুৱাৰিত প্ৰধান মন্ত্ৰী নৰেন্দ্ৰ মোদীয়ে টুৱেনছাঙত আৰু ২৩ ফেব্ৰুৱাৰিত পাৰ্টী অধ্যক্ষ অমিত শ্বাহে বিজেপিৰ হৈ ৰাজ্যখনত দলীয় সভাত অংশ ল’ব।

ৰিজিজুৱে তাৎপৰ্যমূলক মন্তব্য কৰি কয় যে নাগালেণ্ডৰ জলন্ত সমস্যাসমূহ ইয়াৰ পূৰ্বৰ চৰকাৰবোৰে আজিলৈ কেন্দ্ৰীয় চৰকাৰ তথা দিল্লীত সঠিক ৰূপত উপস্থাপন কৰা নাই। কিন্তু নৰেন্দ্ৰ মোদীৰ নেতৃত্বাধীন চৰকাৰ গঠন হোৱাৰ পিছৰে পৰা নতুন দিল্লীত উত্তৰ-পূৰ্বাঞ্চলে গুৰুত্ব লাভ কৰিছে।

আনহাতে নাগা সমস্যা সন্দৰ্ভত তাৎপৰ্যমূলক মন্তব্য কৰি ৰিজিজুৱে কয় যে কেন্দ্ৰত বিজেপি চৰকাৰ গঠন হোৱাৰ পিছতহে দীৰ্ঘদিনীয়া নাগা সমস্যাটোৱে এটা সঠিক দিশ লাভ কৰিছে।