নাগালেণ্ডৰ প্ৰতিষ্ঠা দিবস উপলক্ষে ৰাজ্যবাসীলৈ মুখ্যমন্ত্ৰীৰ শুভেচ্ছা
নাগালেণ্ডৰ মুখ্যমন্ত্ৰী টি আৰ জেলিয়াঙে ১ ডিচেম্বৰৰ ৰাজ্যখনৰ ৫৪ তম প্ৰতিষ্ঠা দিবস উপলক্ষে ৰাজ্যবাসীক শুভেচ্ছা জনাইছে। ‘ মই নাগালেণ্ড চৰকাৰৰ হৈ নাগালেণ্ডৰ সমূহ নাগৰিকক ৫৪ তম ৰাজ্য প্ৰতিষ্ঠা দিবসৰ শুভেচ্ছা জনাইছো,’’-মুখ্যমন্ত্ৰীৰ কৰ্যালয়ৰ পৰা প্ৰকাশ কৰা এক বিবৃতিত মুখ্যমন্ত্ৰী গৰাকীয়ে এইদৰে কয়।
ৰাজ্য দিবসৰ বিষয়ে বৰ্ণনা কৰি মুখ্যমন্ত্ৰীগৰাকীয়ে প্ৰকাশ কৰে যে তদানীন্তন ভাৰতৰ ৰাষ্ট্ৰপতি ড০ সৰ্বপল্লী ৰাধাকৃষ্ণনে ১৯৬৩ চনৰ ১ ডিচেম্বৰত কোহিমা স্থানীয় খেলপথাৰত অনুষ্ঠিত এক অনুষ্ঠানত নাগালেণ্ডক ভাৰতৰ ১৬ তম ৰাজ্য হিচাপে আনুষ্ঠানিকভাৱে ঘোষণা কৰিছিল। তেওঁ এই দিনটোক নাগালেণ্ডৰ ৰাজনৈতিক ইতিহাসৰ এটি বিশেষ দিন হিচাপে অভিহিত কৰি ৰাজ্যবাসীক ৰাজ্যখনৰ সমৃদ্ধিত সহযোগ আগবঢ়াবলৈ আহ্বান জনায়।
‘’ আজি আমি নাগালেণ্ডৰ ৰাজ্য প্ৰতিষ্ঠা দিবস পালন কৰাৰ মুহূৰ্তত মই নাগালেণ্ডৰ জনসাধাৰণক নাগালেণ্ডক এখন সমৃদ্ধিশালী ৰাজ্য হিচাপে গঢ়ি তুলিবলৈ আহ্বান জনাইছো। আজিৰ এই বিশেষ দিনটোত মই নাগালেণ্ডৰ জনসাধাৰণৰ শান্তি সমৃদ্ধি কামনা কৰাৰ লগতে ৰাজ্যখনে এক নতুন দিশলৈ আগবাঢ়ি যোৱাৰ কামনা কৰলো।‘’