নাগালেণ্ড প্ৰচাৰ অভিযানৰ সামৰণি : নিৰ্বাচনী হিংসাত এজনৰ মৃত্যু
অহা ২৭ ফেব্ৰুৱাৰিত হ’ব লগীয়া ত্ৰয়োদশ নাগালেণ্ড বিধানসভা নিৰ্বাচনৰ বাবে আজি ৪ বজাত প্ৰচাৰ অভিযানৰ সামৰণি পৰে। বিভিন্ন কাৰণত এইবাৰ নিৰ্বাচনী প্ৰচাৰ তেনেই সেৰেঙা দেখা গ’ল।
আনহাতে মোটামুটি হিংসামুক্তভাৱে বিগত দিনবোৰ পাৰ হৈছিল যদিও আজি অন্তিম দিনা নিৰ্বাচনী হিংসাত এজন লোকৰ প্ৰাণ যায়। আন বহুকেইজন আহত হয়। ৰাজ্যখনৰ মোককচাং জিলাৰ তুলিত এই হিংসাত্মাক ঘটনা হয়। ঘটনাৰ বিৱৰণী মতে দুটা ৰাজনৈতিক দলৰ সমৰ্থকৰ মাজত গুলীয়াগুলীৰ ফলত এজন লোক নিহত হয়।
সূত্ৰটোৱে জনোৱা মতে আজি চূণটিয়াত এটা ৰাজনৈতিক দলে নিৰ্বাচনী প্ৰচাৰ চলাই থকাৰ সময়ত আন দলৰ সমৰ্থকৰ মুখামুখি হোৱাত এই সংঘৰ্ষৰ সূত্ৰপাত ঘটে। ইয়াৰ পিছত এই আক্ৰমণত এজন যুৱকৰ মৃত্যু হোৱা বুলি খবৰ ছ’চিয়েল মিডিয়াত ভাইৰেল হৈ পৰাত সমগ্ৰ অঞ্চলটোত উত্তেজনা বিয়পি পৰে। লগে লগে ঘটনাৰ খবৰ পাই নাগালেণ্ড আৰক্ষীয়ে পৰিস্থিতি নিয়ন্ত্ৰণ কৰাৰ চেষ্টা চলাই আৰু আহতসকলক চিকিৎসালয়লৈ নিয়াৰ ব্যৱস্থা কৰে।
আনহাতে মোককচাং জিলা প্ৰশাসনে জিলাখনত ১৪৪ ধাৰা আৰোপ কৰিছে। নাগালেণ্ড আৰক্ষীয়ে জনোৱা মতে এই পৰ্য্যন্ত ৰাজ্যখনত ২১২১ জন লোকক গ্ৰেপ্তাৰ কৰা হৈছে। আৰু ৪৪ খন জামিনবিহীন গ্ৰেপ্তাৰী পৰোৱানা জাৰি কৰা হৈছে।
ৰাজ্যখনৰ মুখ্য নিৰ্বাচনী বিষয়া অভিজিৎ সিনহাই এছ এম এছ যোগে সকলো ভোটাৰকে অহা ২৭ তাৰিখে পুৱা ৭ বজাৰ পৰা আবেলি ৪ বজালৈকে শান্তিপূৰ্ণভাৱে আৰু দায়বদ্ধতাৰে ভোট দিবলৈ আহ্বান জনাইছে।
উল্লেখযোগ্য যে নাগালেণ্ডত অহা ২৭ তাৰিখে নিৰ্বাচন অনুষ্ঠিত হ’ব। মুঠ ৫৯ টা সমষ্টিৰ বাবে ১৯৫জন প্ৰাৰ্থীয়ে প্ৰতিদ্বন্দ্বিতা কৰিছে।