নাগালেণ্ড বিধানসভা নিৰ্বাচন : এনডিপিপিৰে আসন বুজাবুজিক লৈ অসন্তুষ্ট ৰাজ্যিক বিজেপি

নাগালেণ্ড বিধানসভা নিৰ্বাচনত বিজেপি আৰু এনডিপিপিয়ে আসন ভাগ-বাটোৱাৰা কৰিব বুলি আনুষ্ঠানিকভাৱে ঘোষণা কৰাৰ মাত্ৰ এদিন পাছতে এইক্ষেত্ৰত তীব্ৰ অসন্তুষ্টি ব্যক্ত কৰি হাইকমাণ্ডলৈ পত্ৰ প্ৰেৰণ কৰিছে প্ৰদেশ বিজেপিয়ে।

নাগালেণ্ড বিজেপিৰ সভাপতি বৈশাওলী লংগুৱে এক পত্ৰযোগে বিজেপিৰ ৰাষ্টীয় সভাপতি অমিত শ্বাহক নিজৰ অসন্তুষ্টি ব্যক্ত কৰি কয়­ যে প্ৰদেশ বিজেপিয়ে আগতীয়া কোনো মিত্ৰতা অবিহনে নিৰ্বাচনত অৱতীৰ্ণ হোৱাৰ সিদ্ধান্ত গ্ৰহণ কৰিছে। অৱেশ্য ফলাফলৰ পাছত প্ৰয়োজন অনুসৰি দলটোৱে নিৰ্বাচনত্তোৰ মিত্ৰতা কৰিবলৈ সাজু আছে।

নাগালেণ্ড বিধানসভা নিৰ্বাচনত বিজেপিৰ তত্ত্বাৱধায়ক কিৰেন ৰিজিজু আৰু এনডিপিপিৰ মুৰব্বী নেফিঅ’ ৰিঅ’ই যোৱা শনিবাৰে গুৱাহাটীত সংবালমেলযোগে মিত্ৰতাৰ কথা ঘোষণা কৰাৰ পাছত প্ৰদেশ বিজেপিয়ে উক্ত মিত্ৰতাক নাকচ কৰাটো যথেষ্ট তাৎপৰ্যপূৰ্ণ।

উল্লেখ্য যে গুৱাহাটীত অনুষ্ঠিত সংবাদমেলখনত ৬০খন আসনিবিশিষ্ট নাগালেণ্ড বিধানসভা নিৰ্বাচনত এনডিপিপিয়ে ৪০খন আসনত প্ৰতিদ্বন্দ্বিতা কৰাৰ বিপৰীতে বিজেপিয়ে বাকী থকা আসনত প্ৰাৰ্থী দিব বুলি ঘোষণা কৰিছিল।

আনহাতে নাগালেণ্ড বিজেপিৰ সাধাৰণ সম্পাদক এডুজু ডিলুঅ’এ এইক্ষেত্ৰত প্ৰতিক্ৰিয়া ব্যক্ত কৰি কয় যে প্ৰদেশ বিজেপিৰ পৰা নিৰ্বাচনত প্ৰতিদ্বন্দ্বিতা কৰিব পৰা ৪৫গৰাকীমান সম্ভৱনাপূৰ্ণ প্ৰাৰ্থী আছে। প্ৰদেশখনত দিনে দিনে দলটোৰ প্ৰাধান্য বৃদ্ধি পাইছে আৰু নিৰ্বাচনত ইয়ে যথেষ্ট প্ৰভাৱ পেলাব। এনডিপিপিতকৈ বিজেপিৰ সম্ভাৱনা বেছি আছে।

যদিহে বিজেপিয়ে অকলে নিৰ্বাচনত প্ৰতিদ্বন্দ্বিতা কৰে তেন্তে অন্য দলৰ প্ৰতিনিধিয়েও দলটোত যোগদানৰ সম্ভাৱনা আছে। সেয়েহে নাগালেণ্ড বিজেপিয়ে প্ৰাক্ নিৰ্বাচনী মিত্ৰতা কোনোপধ্যে মানি ল’ব নোৱাৰে।

অহা ২৭ ফেব্ৰুৱাৰিত অনুষ্ঠিতব্য নিৰ্বাচনৰ পূৰ্বে বিজেপিৰ বাবে ইয়াক এক নতুন সংকট বুলিব পাৰি।