নাগৰিকত্ব আইন সংশোধনৰ বিৰুদ্ধে ঐক্যবদ্ধ হওক ৰাইজ, সংসদীয় সমিতিয়ে অসমত পাতক শুনানি : অসমৰ নাগৰিক সমাজ

‘ধৰ্মীয় পক্ষপাতিত্বৰে ১৯৭১ চনৰ পিছত অহা হিন্দু বাংলাদেশীসকলক নাগৰিকত্ব প্ৰদানৰ’ বাবে কেন্দ্ৰৰ বিজেপি চৰকাৰে লোৱা নাগৰিকত্ব আইন সংশোধন বিধেয়ক ( The Citizenship Act Amendment Bill )  ‘উদ্যোগ’ৰ বিৰুদ্ধে ‘ঐক্যবদ্ধহৈ’ মাত মাতিবলৈ অসমৰ ৰাইজক গোহাৰি জনাইছে ‘অসমৰ নাগৰিক সমাজ’এ।

চৰকাৰৰ এই ‘উদ্যোগ’ ‘অসমৰ জাতীয় পৰিচয়ৰ প্ৰতি ভাবুকি’ৰূপে অভিহিত কৰি অসমৰ বহুসংখ্যক বিশিষ্ট শিল্পী-সাহিত্যিক, বুদ্ধিজীৱী-সাংবাদিক, বিজ্ঞানী-উদ্ভাৱক, পৰিৱেশ-ৰাজনৈতিক কৰ্মী, প্ৰাক্তন আমোলা, অধ্যাপক, এন জি অ’ কৰ্মী আৰু অধিবক্তাই নাগৰিকত্ব আইন সংশোধনৰ দুৰ্ঘোৰ বিৰোধিতাৰে আজি ১২ এপ্ৰিলত এই গোহাৰি জনাইছে।

নাগৰিকত্ব বিধেয়কখনক লৈ ৰাইজৰ মতামত লোৱাৰ উদ্দেশ্যৰে গঠিত যুটীয়া সংসদীয় সমিতিৰ অধ্যক্ষ ৰাজেন্দ্ৰ আগৰৱালাই ‘যিহেতু ধৰ্মৰ নামত দেশ বিভাজন হৈছিল, হিন্দু বাংলাদেশীসকলক ভাৰতত নাগৰিকত্ব দিয়াৰ কথাটো বিশেষভাৱে কিয় বিবেচনা কৰিব নোৱাৰি’ বুলি কৰা মন্তব্যক ‘পক্ষপাতিত্বমূলক আৰু অত্যন্ত আপত্তিজনক’ বুলি অভিহিত কৰি ‘তেওঁলোকে যদি আগতীয়াকৈ সিদ্ধান্ত লৈয়ে থৈছে তেন্তে ৰাজহুৱা শুনানিৰ অৰ্থ কি?’ বুলি নাগৰিক সমাজে প্ৰশ্ন কৰে।

আনহাতে সংসদীয় সমিতি অসমলৈ আহিব খোজোতে ‘আইন-শৃংখলাৰ দোহাই দি’ অসম চৰকাৰে ‘আহিব নালাগে’ বুলি কোৱাটো ‘অসমবিৰোধী নহয়নে?’ বুলি প্ৰশ্ন কৰি ‘অসমৰ সকলো শ্ৰেণীৰ জনসাধাৰণে যাতে অসমৰ মাটিত নিঃসংকোচে সংসদীয় সমিতিৰ আগত তেওঁলোকৰ মতামত দাঙি ধৰিব পাৰে তাৰ বাবে যুটীয়া সমিতিৰ অসম আগমণ সুচল কৰিবলৈ’ অসম চৰকাৰক দাবী জনায়।

সমাজে লগতে অভিযোগ কৰে যে চলি থকা এন আৰ চি উন্নীতকৰণৰ কাম চৰকাৰে ‘উদ্দেশ্যপূৰ্ণভাৱে বাধাগ্ৰস্ত কৰিছে’।