নাগৰিকত্ব বিধেয়কৰ জৰিয়তে অসমীয়া জাতি নিঃশেষ কৰাৰ পৰিকল্পনা ৰচিছে কেন্দ্ৰই : প্ৰফুল্ল কুমাৰ মহন্ত
‘অসম তথা ৰাজ্যৰ খিলঞ্জীয়া জনগোষ্ঠীৰ ক্ষতি হোৱা একো কামেই আমি নকৰো। অকল নাগৰিকত্ব সংশোধনী বিধেয়কে নহয় বিজেপি চৰকাৰে জাপি দিব বিচৰা সকলো জাতিধ্বংসী কাৰ্যকলাপৰ সদায় বিৰোধীতা কৰি যাম। অসমৰ ক্ষতি হোৱা কোনো কাৰ্য অসম গণ পৰিষদে মানি নলয় আৰু হ’বলৈও নিদিয়ে’। এই মন্তব্য অগপৰ সভাপতি তথা কৃষি মন্ত্ৰী অতুল বৰাৰ।
বৃহস্পতিবাৰে মৰিগাঁও জিলা পুথিভঁৰাল প্ৰেক্ষাগৃহত অনুষ্ঠিত অগপৰ ভাতৃ সংগঠন অসম যুৱ পৰিষদৰ মৰিগাঁও, নগাঁও আৰু হোজাই জিলা সমিতিৰ উদ্যোগত আয়োজিত মাণ্ডলিক যুৱ কৰ্মশালাত উপস্থিত থাকি মন্ত্ৰী অতুল বৰাই এইদৰে কয়।
ইফালে এই সভাতে অসমৰ প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই কয় যে আঞ্চলিক শক্তিক ধ্বংস কৰি অসমীয়া জাতিক নিঃশেষ কৰিবলৈ কেন্দ্ৰীয় চৰকাৰে নাগৰিকত্ব সংশোধনী বিধেয়কখন অতি কৌশলেৰে গৃহীত কৰিব ওলাইছে। আৰু ইয়াৰ বিৰুদ্ধে আমি সংগ্ৰাম কৰি যাব লাগিব।
আনহাতে, যুৱ পৰিষদৰ সভাখনত অগপৰ কাৰ্যকৰী সভাপতি তথা মন্ত্ৰী কেশৱ মহন্তই যুৱ শক্তিক ৰাজ্যখনৰ স্বাৰ্থত মাৰবান্ধি থিয় হ’বলৈ আহ্বান জনোৱাৰ লগতে দলক অন্য গতি দিয়াৰ বাবে যুৱ শক্তিয়ে প্ৰধান অস্ত্ৰ বুলি মন্তব্য কৰে।
উল্লেখ্য যে অসম যুৱ পৰিষদৰ সভাপতি সুনীল ডেকাৰ সভাপতিত্বত অনুষ্ঠিত হোৱা মাণ্ডলিক যুৱ কৰ্মশালাখনত মন্ত্ৰী ফণীভূষণ চৌধুৰী, দলৰ বিধায়ক সত্যব্ৰত কলিতা, প্ৰাক্তন মন্ত্ৰী ডাঃ কমলা কলিতা, বুবুল দাস, প্ৰাক্তন বিধায়ক নুৰুল হুছেইন আদি উপস্থিত থাকি ভাষণ প্ৰদান কৰে।