নাগৰিকত্ব সংশোধনী বিধেয়ক : মেঘালয় চৰকাৰৰ সিদ্ধান্তক আদৰণি আছু, নেছ’ৰ

নাগৰিকত্ব সংশোধনী বিধেয়ক ২০১৬’ৰ বিৰোধিতা কৰি মেঘালয় চৰকাৰৰ কেবিনেটে গ্ৰহণ কৰা সিদ্ধান্তক সদৌ অসম ছাত্ৰ সন্থা আৰু উত্তৰ-পূৰ্বাঞ্চল ছাত্ৰ সন্থা (নেছ’)ই আদৰণি জনাইছে।

সদৌ অসম ছাত্ৰ সন্থাৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈয়ে মেঘালয় চৰকাৰৰ সিদ্ধান্তক আদৰণি জনাই অসম চৰকাৰকো তেনেধৰণে সিদ্ধান্ত লোৱাৰ বাবে আহ্বান জনাইছে।

খিলঞ্জীয়া লোকৰ স্বাৰ্থ ৰক্ষাৰ প্ৰতিশ্ৰুতি দি ক্ষমতালৈ অহা অসম চৰকাৰক মেঘালয় চৰকাৰৰ দৰে সাহসী সিদ্ধান্ত লৈ দেখুৱাবলৈ বিবৃতিযোগে আহ্বান জনাইছে আছুৰ নেতা দুগৰাকীয়ে।

আনহাতে উত্তৰ-পূৰ্বাঞ্চল ছাত্ৰ সন্থা (নেছ’)ৰ অধ্যক্ষ চেমুৱেল জেৰৱা, সম্পাক প্ৰধান চিনাম প্ৰকাশ আৰু উপদেষ্টা ড০ সমুজ্বল ভট্টাচাৰ্যয়ো মেঘালয় চৰকাৰৰ সাহসী সিদ্ধান্তক আদৰণি জনাই কয়, ‘’ উত্তৰ-পূৰ্বাঞ্চলৰ সকলো ৰাজ্য চৰকাৰে উত্তৰ-পূৰ্বাঞ্চলৰ খিলঞ্জীয়া লোকৰ সুৰক্ষিত ভৱিষ্যতৰ বাবে অনুৰূপ বলিষ্ঠ সিদ্ধান্ত গ্ৰহণ কৰক।‘

কেন্দ্ৰীয় চৰকাৰে উত্তৰ-পূৰ্বাঞ্চলৰ খিলঞ্জীয়া মানুহৰ পৰিচয়, অস্তিত্ব নিশেষ কৰিব পৰা সিদ্ধান্ত উত্তৰ-পূৰ্বাঞ্চলত জাপি দিলে কোনো কাৰণতে, কোনো পৰিস্থিতিতে মানি লোৱা নহ’ব বুলি উত্তৰ-পূৰ্বাঞ্চলৰ সকলো কেইখন ৰাজ্য চৰকাৰে সেই কথা কেন্দ্ৰীয় চৰকাৰক স্পষ্টভাৱে জনাই দিবলৈ তেওঁলোকে দাবী জনাইছে।