নাগৰিকত্ব সংশোধনী বিধেয়ক বাতিলৰ দাবীত অগপৰ জোঁৰ সমদল
নাগৰিকত্ব সংশোধনী বিধেয়ক অতি শীঘ্ৰে বাতিল কৰাৰ দাবীত অসম গণ পৰিষদ দলে শুকুৰবাৰে সন্ধিয়া গুৱাহাটীত জোঁৰ সমদল কৰি প্ৰতিবাদ সাৱ্যস্ত কৰে। গুৱাহাটীৰ আমবাৰীৰ দলৰ মুখ্য কাৰ্যালয়ৰ পৰা দীঘলীপুখুৰী পাৰলৈ জোঁৰ লৈ দলটোৰ কেইবাশ নেতা-কৰ্মীয়ে অংশগ্ৰহণ কৰে।
জোঁৰ সমদত অংশগ্ৰহণ কৰে প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, প্ৰাক্তন সাংসদ দীপক কুমাৰ দাস, বিধায়ক ৰমেন্দ্ৰ নাৰায়ন কলিতাকে ধৰি নেতাসকলৰ লগতে দলৰ কৰ্মীসকলে।
অসম গণ পৰিষদ দলে যোৱা ৭ মে’ত গুৱাহাটীত যুটীয়া সংসদীয় সমিতিয়ে নাগৰিকত্ব সংশোধনী বিধেয়ক সন্দৰ্ভত গ্ৰহণ কৰা শুনানিত বিধেয়কখনৰ বিৰোধিতাৰে মতামত প্ৰদান কৰিছিল। সমিতিৰ আগত তেওঁলোকে বিধেয়কখন গৃহীত হ’লে ই অসমৰ স্বাৰ্থ বিঘ্নিত কৰিব বুলি শংকা ব্যক্ত কৰিছিল। বিধেয়কখনে অসমত সৃষ্টি কৰিব পৰা পৰিস্থিতি সম্পৰ্কত সকলো দিশ সামৰি অগপই সংসদীয় সমিতিক স্মাৰক পত্ৰ প্ৰদান কৰিছিল।
অগপই ইতিমধ্যে নাগৰিকত্ব সংশোধনী বিধেয়ক কেবিনেটত উত্থাপন কৰাৰ লগতে বিষয়টো আলোচনাৰ বাবে অসম বিধানসভাৰ এখন বিশেষ অধিৱেশনৰ কৰাৰ দাবী উত্থাপন কৰিছে।
উল্লেখযোগ্য যে অসমৰ বিজেপি মিত্ৰজোঁট চৰকাৰৰ অংশীদাৰ অসম গণ পৰিষদ দলে নাগৰিকত্ব সংশোধনী বিধেয়কৰ বিৰোধিতা কৰাৰ বিপৰীতে বিজেপিয়ে ইয়াৰ প্ৰতি সমৰ্থন আগবঢ়াইছে। অৱশ্যে এই ক্ষেত্ৰত চৰকাৰৰ ফালৰ পৰা এতিয়ালৈ কোনো স্পষ্ট মতামত ব্যক্ত কৰা নাই।