নামৰূপ লেখিকা সমাৰোহ সমিতিয়ে পালন কৰিলে ইয়াৰ প্ৰতিষ্ঠা দিৱস

নামৰূপৰ লেখিকা সমাৰোহ সমিতিয়ে শনিবাৰে নামৰূপ সাহিত্য সভা প্ৰেক্ষাগৃহত ইয়াৰ প্ৰতিষ্ঠা দিৱস পালন কৰে।

নামৰূপৰ একাংশ শিল্পীয়ে পৰিৱেশন কৰা অসম সাহিত্য সভাৰ শীৰ্ষক গীত ‘চিৰ চেনেহী মোৰ ভাষা জননী’ ৰে অনুষ্ঠানৰ শুভাৰম্ভ কৰা হয় আৰু ইয়াৰ পিছতে এটি বৰগীত পৰিৱেশন কৰে স্মৃতিৰেখা কলিতাই।

নামৰূপ লেখিকা সমাৰোহ সমিতিৰ প্ৰতিষ্ঠা দিৱসৰ কাৰ্যসূচীত সভাপতিত্ব কৰে নামৰূপ লেখিকা সমাৰোহ সমিতিৰ সভানেত্ৰী আৰতি দেৱী শৰ্মাই।

প্ৰতিষ্ঠা দিৱসৰ অনুষ্ঠানত মুখ্য অতিথি হিচাপে উপস্থিত থাকে লেখিকা সমাৰোহৰ জিলা সভানেত্ৰী ড০ ভাৰতী দত্ত।

অনুষ্ঠানত ভাষণ দি ড০ দত্তই কয়, ‘’গোটেই অসমতে বৃহৎ সংখ্যক সদস্য থকা আমি এটা বিশাল সংগঠন। লেখিকা সমাৰোহ এটা এনেকুৱা সংগঠন য’ত মহিলাসকলে নিজৰ প্ৰতিভা প্ৰদৰ্শনৰ এখন মঞ্চ বিচাৰি পায়।‘’

এই অনুষ্ঠানতে লেখিকা সমাৰোহৰ কাৰ্যকৰী সভানেত্ৰী ৰূপালী মহন্ত পাটগিৰিয়ে এখন প্ৰাচীৰ পত্ৰিকা উন্মোচন কৰে।

অনুষ্ঠানত বিবি মহন্তক ‘তেজস্বিনী’ খিতাপ প্ৰদান কৰা হয়।

অনুষ্ঠানত উপস্থিত থকা বিশিষ্ট অতিথিসকলৰ ভিতৰত আছিল ডিব্ৰুগড় জিলা লেখিকা সমাৰোহৰ সভানেত্ৰী ড০ ভাৰতী দত্ত, বি এড কলেজৰ অধ্যক্ষা স্মৃতি দত্ত বৰা, ডিব্ৰুগড় জিলা লেখিকা সমাৰোহৰ সম্পাদিকা ৰেণু ফুকন আৰু নামৰূপ নগৰ সমিতিৰ অধ্যক্ষা নীতু সোণোৱাল বুঢ়াগোঁহাই।