নিৰ্মাণ সম্পূৰ্ণ হোৱা সত্ত্বেও চৰকাৰী অৱহেলাৰ বাবে এৰাবাৰীত পৰিণত লিডুৰ আই টি আই

চৰকাৰে ৰাজ্যৰ শিক্ষাখণ্ডৰ উন্নয়ণৰ দাবী জনাই অহাৰ বিপৰীতে বাস্তৱত ইয়াৰ এক অন্য ছবিহে দেখিবলৈ পোৱা যায়। তিনিচুকীয়া জিলাৰ লিডুস্থিত উদ্যোগিক প্ৰশিক্ষণ কেন্দ্ৰ (আই টি আই ) এ হৈছে ইয়াৰ এক অন্যতম উদাহৰণ।

উল্লেখযোগ্য যে ২০১১ চনৰ ফেব্ৰুৱাৰিত আধাৰশিলা স্থাপন কৰা শৈক্ষিক প্ৰতিষ্ঠানটোৰ নিৰ্মাণ কাৰ্য প্ৰায় সম্পূৰ্ণ হৈ উঠাৰ পিছতো এতিয়ালৈকে ইয়াক মুকলি কৰা নাই। বৰঞ্চ ২০১৮ চনৰ পৰা প্ৰতিষ্ঠানটোৰ শিক্ষাবৰ্ষ আৰম্ভ হ’ব বুলি মাৰ্ঘেৰিটাৰ বিধায়ক ভাস্কৰ শৰ্মাই কৰি অহা ৰাজহুৱা ঘোষণাক প্ৰহসনত পৰিণত কৰি চৰকাৰী অৱহেলাত এতিয়া কেন্দ্ৰটো এৰাবাৰীত পৰিণত হৈছে।

কংগ্ৰেছৰ প্ৰাক্তন উদ্যোগ মন্ত্ৰী প্ৰদ্যুত বৰদলৈৰ প্ৰচেষ্টাত শৈক্ষিক প্ৰতিষ্ঠানটোৰ নিৰ্মাণ কাৰ্য প্ৰায় সম্পূৰ্ণ হৈছিল যদিও কিছু অংশৰ কাম বাকী থকা প্ৰতিষ্ঠানটো আজি পৰ্যন্ত মুকলি কৰিব নোৱৰাত ক্ষোভিত হৈ পৰিছে স্থানীয় ৰাইজ তথা দল-সংগঠন।

কেইবা কোটি টকা ব্যয়েৰে নিৰ্মাণ কৰাৰ পিছতো চৰকাৰ তথা মন্ত্ৰী-বিধায়কৰ অৱহেলাত এনেদৰে আই টি আই কেন্দ্ৰটো পৰিত্যক্ত হৈ থকাত ক্ষোভ প্ৰকাশ কৰি অসম জাতীয়তাবাদী যুৱ-ছাত্ৰ পৰিষদে কেন্দ্ৰটোৰ মুকলিৰ দাবীত বুধবাৰে এক তিনি ঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে।

সংগঠনটোৰ মাৰ্ঘেৰিটা আঞ্চলিক সমিতিয়ে লিডু ৰে’লৱেই ৰঙ্গমঞ্চত আজি অৱস্থান ধৰ্মঘট কাৰ্যসূচীৰ জৰিয়তে প্ৰতিষ্ঠানটো শীঘ্ৰে মুকলি কৰিবলৈ দাবী জনোৱাৰ লগতে নিৰ্বাচনৰ আগত পৰিৱৰ্তনৰ মিছা প্ৰতিশ্ৰুতিৰে ৰাইজক আভুৱা ভাঁৰাৰ বাবে স্থানীয় বিধায়ক ভাষ্কৰ শৰ্মা তথা বিজেপি মিত্ৰজোঁট চৰকাৰক কঠোৰ ভাষাৰে সমালোচনা কৰে।

আনহাতে বিভাগীয় কৰ্তৃপক্ষৰ অমনোযোগিতাৰ ফলত ধ্বংসস্তুপলৈ পৰিণত হ’বলৈ ধৰা প্ৰতিষ্ঠানটোৰ শ্ৰেণী কোঠাৰ এক বৃহৎ অংশৰ টিনপাত বতাহ-ধুমুহাই উৰুৱাই নিয়াৰ লগতে দুৱাৰ-খিৰিকি আৰু চিলিং বোৰো কোনো দুস্কৃতিকাৰীয়ে ভাঙি পেলাইছে। তৎসত্ত্বেও গা-লৰা নাই সংশ্লিষ্ট কৰ্তৃপক্ষৰ।