বংশবৃক্ষ পৰীক্ষণৰ শুনানিৰ অগ্ৰগতিৰ পৰ্যালোচনা কৰিলে অংগমুথুৱে
এখন শুদ্ধ নাগৰিক পঞ্জীৰ বাবে বংশবৃক্ষ পৰীক্ষণৰ প্ৰক্ৰিয়া ৰাজ্যখনৰ আন অংশৰ লগতে কামৰূপ মহানগৰ জিলাটো শনিবাৰৰ পৰা আৰম্ভ হৈছে।
পাঁচটা ৰাজহ চক্ৰক সামৰি জিলাখনৰ অধীনত মুঠতে ১,৭৪১৯ ৰ বাবে পৰীক্ষণ প্ৰক্ৰিয়া অনুষ্ঠিত হৈছে।
কামৰূপ মহানগৰ জিলাৰ উপায়ুক্ত ড০ এম অংগমুথুৱে উজান বজাৰৰ দুটা এনআৰচি সেৱা কেন্দ্ৰ আৰু বামুনীমৈদামৰ আদৰ্শ সেৱা কেন্দ্ৰটো পৰিদৰ্শন কৰে। গুৱাহাটী ৰাজহ চক্ৰৰ অধীনৰ দুয়োটা সেৱা কেন্দ্ৰতে প্ৰক্ৰিয়াটোৰ অগ্ৰগতিৰ বুজ লোৱাৰ বাবে অতিৰিক্ত উপায়ুক্ত ক্ষিতিশ চন্দ্ৰ পেগু আৰু গুৱাহাটী ৰাজহ চক্ৰৰ চক্ৰ বিষয়া দামোদৰ বৰ্মনকলৈ পৰিদৰ্শন কৰে।
শুনানিৰ বাবে এনআৰচি সেৱা কেন্দ্ৰত উপস্থিত হোৱা ৰাইজৰ লগত তেওঁ মত বিনিময় কৰে। গোটেই বংশবৃক্ষ পৰীক্ষণ প্ৰক্ৰিয়াটো সফলতাৰে সম্পূৰ্ণ কৰিবলৈ প্ৰয়োজনীয় সকলো পদক্ষেপ গ্ৰহণ কৰাৰ বাবে তেওঁ বিষয়াসকলক নিৰ্দেশ দিয়ে। তেওঁলোকক প্ৰয়োজন হোৱা যিকোনো কাৰিকৰী সহায় তথা সা-সামগ্ৰী আগবঢ়োৱাৰ তেওঁ প্ৰতিশ্ৰুতি দিয়ে।
বংশবৃক্ষ পৰীক্ষণ হৈছে এক ভুল সংশোধনী প্ৰক্ৰিয়া। ইয়াত কোনো ব্যক্তিৰ লিগেচি ডাটা ব্যৱহাৰ কৰি দাখিল কৰা বংশবৃক্ষত কোনো বিসংগতি ধৰা পৰা লোকসলক পত্ৰৰ জৰিয়তে এই পৰীক্ষণ প্ৰক্ৰিয়াৰ বাবে মতা হৈছে। শনিবাৰৰ পৰা সপ্তাহৰ প্ৰতিটো দিনতে চলিবলগীয়া এই প্ৰক্ৰিয়াটো অহা ৩১ মাৰ্চত সামৰণি পৰিব।
কামৰূপ মহানগৰৰ বাবে পৰীক্ষণ প্ৰক্ৰিয়া অনুষ্ঠিত হৈছে ইয়াত থকা ৭৮ টা এনআৰচি সেৱা কেন্দ্ৰত।
১৯ ফেব্ৰুৱাৰীৰ পৰা প্ৰথম সপ্তাহটোৰ বাবে প্ৰতিদিনে প্ৰতিটো কেন্দ্ৰত পাঁচটাকৈ পৰীক্ষণ প্ৰক্ৰিয়া সম্পন্ন কৰা হ’ব।