বহু চৰ্চিত প্ৰেম যুটী মিলিন্দ আৰু অংকিতাই দৌৰিব ১৩০ কিলোমিটাৰ

মিলিন্দ সুমন আৰু তেওঁৰ প্ৰেমিকা অংকিতা কোঁৱৰে এক বিশেষ প্ৰেম যুটী হিচাপে চৰ্চিত হোৱাৰ সময়তে সেয়া বাস্তৱিকতে প্ৰমাণ কৰিবলৈ আগবাঢ়িছে দুই প্ৰেমিক যুগল।

দুয়োজনে এতিয়া উনাৰ পৰা ধৰমশালালৈ ১৩০ কিলোমিটাৰ দৌৰাৰ সিদ্ধান্ত লৈছে। দু:সাহসিক ক্ৰীড়াৰ প্ৰতি আগ্ৰহী এই যুটীয়ে তেওঁলোকৰ অভিযানৰ সময়ত কিছু ফিটনেছ মন্ত্ৰও আগবঢ়াব অনুৰাগীসকলক।

বলিউডত ফিটনেছৰ এক প্ৰতীক হিচাপে পৰিচিত বয়সে হাৰ নমনা অভিনেতাগৰাকীৰ নামত কেইবাটাও অভিলেখে এতিয়া ভিৰ কৰিছেহি। তেওঁ তেওঁৰ এয়াৰ হোষ্টেছ প্ৰেমিকাগৰাকীৰ সৈতে এটা ফটো শ্বেয়াৰ কৰি লিখিছে , ‘’ৰাতিপুৱা ৫ বজাতে উঠি দীঘল দৌৰৰ বাবে সাজু হ’ম, উনাৰ পৰা ধৰমশালা ১৩০ কিলোমিটাৰ। ‘’

অভিনেতা তথা ফিট্নেছ প্ৰোৎসাহী মিলিন্দ সুমনে অলপতে নিজৰ ৫২ বছৰীয়া জন্মদিনটো  প্ৰেমিকা অংকিতা কোঁৱৰৰ সৈতে নৰ’ৱেত উদযাপন কৰাৰ পিছতে পুনৰ চৰ্চাৰ মাজলৈ আহিছিল। তেওঁলোকৰ প্ৰেম সম্বন্ধীয় নিবিড় মুহূৰ্তৰ আলোকচিত্ৰ প্ৰকাশ পোৱাৰ পিছত তেওঁলোকৰ মাজৰ বয়সৰ পাৰ্থক্যৰ কথা আলোচনাৰ বিষয় হৈ পৰিছিল।

অৱশ্যে অভিনেতাজনে তেওঁৰ আৰু প্ৰেমিকাৰ মাজৰ সম্পৰ্কটো লুকঢাক নকৰাকৈ প্ৰকাশ কৰিছে। একান্ত ব্যক্তিগত কিছু আলোকচিত্ৰ প্ৰকাশ কৰাৰ লগতে তেওঁলোকৰ ৰোমান্টিক সম্পৰ্কৰ ইংগিত দাঙি ধৰি কিছু মন্তব্যও কৰিছে।

নৰ’ৱেৰ সেই ভ্ৰমণৰ কথা মাথোঁ সুৱঁৰি বৰ বেছি কথা প্ৰকাশ কৰা নাই অভিনেতাগৰাকীয়ে। মিলিন্দে কৈছে, ‘’এইয়া আছিল এক সম্পূৰ্ণ আৰু একক জন্মদিনৰ উদযাপন।‘’

প্ৰেমিকা অংকিতা কোৱঁৰৰ সৈতে প্ৰেমৰ সম্পৰ্কই পোখা মেলি উঠা মিলিন্দ সুমনে এতিয়া একাকীত্বৰ পৰা মুক্ত হৈ সংসাৰ বন্ধনৰ মাজত সোমাই পৰিব। শেহতীয়াকৈ দুয়োজনকে ইজনে সিজনৰ সংগত সুখী হিচাপে দেখা পোৱা গৈছে।