বাক্সাৰ উন্নয়নমূলক কাম-কাজ তথা আইন-শৃংখলাৰ বুজ ল’লে ৰাজ্যপাল জগদীশ মুখীয়ে

অসমৰ ৰাজ্যপাল প্ৰফেছৰ জগদীশ মুখী মঙলবাৰে বাক্সা জিলাত উপস্থিত হৈ জিলা উপায়ুক্তৰ লগতে বিভিন্ন বিভাগৰ চৰকাৰী বিষয়াসকলৰ সৈতে এক আলোচনাত মিলিত হয়। ৰাজ্যপালগৰাকীয়ে জিলাখনৰ আইন-শৃংখলা দিশটোৰ লগতে ৰাজ্য চৰকাৰে গ্ৰহণ কৰা বিভিন্ন উন্নয়নমূলক আঁচনিৰ কাম-কাজ সম্পৰ্কে খতিয়ান লয়।

জিলা উপায়ুক্তৰ সভাগৃহত আয়োজিত পৰ্যালোচনামূলক সভাত ৰাজ্যপালগৰাকীয়ে অংশ লৈ জিলাখনৰ সকলো উচ্চ পদস্থৰ চৰকাৰী বিষয়াসকলক স্বাস্থ্য, খোৱা পানী, স্বচ্ছতা, শিক্ষা, যাতায়ত ব্যৱস্থা আৰু কৃষিক্ষেত্ৰ উন্নয়নৰ সম্পৰ্কত বিশেষভাবে গুৰুত্ব প্ৰদান কৰিবলৈ আহ্বান জনায়।

ইয়াৰ উপৰি জিলাখনৰ সকলো শ্ৰেণীৰ লোকে যাতে চৰকাৰী আঁচনি সমূহৰ সঠিক লাভা লাভ গ্ৰহণ কৰিব পাৰে তাৰ বাবে ৰাজ্যপাল মুখীয়ে প্ৰশাসনক চোকা দৃষ্টি নিবদ্ধ ৰাখিবলৈ নিৰ্দেশ দিয়ে।

আঁচনি সমূহৰ সঠিক ৰূপায়ন সম্পৰ্কে বাক্সা জিলাৰ উপায়ুক্ত সঞ্জীৱ কুমাৰ গগৈয়ে ৰাজ্যপালগৰাকীক অৱগত কৰি কয় যে এই ক্ষেত্ৰত জিলা প্ৰশাসনৰ তৰফৰ পৰা পৰ্যাপ্ত ব্যৱস্থা গ্ৰহণ কৰা হৈছে।

আনহাতে এই আলোচনা কালত ৰাজ্যপাল মুখীয়ে স্বচ্ছতাৰ দিশতো বিশেষ গুৰুত্ব আৰোপ কৰা দেখা যায়। আৰু সকলো চৰকাৰী শিক্ষানুষ্ঠান-প্ৰতিষ্ঠান, কাৰ্যালয়ৰ লগতে চিকিৎসালয় সমূহত স্বচ্ছতা বজাই ৰাখিবলৈ অনুৰোধ জনোৱাৰ লগতে মাজে মাজে উপায়ুক্তগৰাকীক পৰিদৰ্শন কৰাৰ বাবেও নিৰ্দেশ দিয়ে।

পৰ্যালোচনা সভাৰ অন্তত প্ৰফেছৰ মুখী ২০০ বিচনাযুক্ত মুছলপুৰস্থিত ডাঃ ৰবি বড়ো অসামৰিক চিকিৎসালয়ত উপস্থিত হৈ ৰোগীসকলৰ লগত মত-বিনিময় কৰা দেখা যায়।

ইয়াৰ উপৰি তেওঁ মুছলপুৰ উচ্চতৰ মাধ্যমিক বিদ্যালয়ৰ শিক্ষক-শিক্ষয়ত্ৰীসকলৰ লগতো আলোচনাত মিলিত হয়।

এদিনীয়া বাক্সা জিলা ভ্ৰমণৰ সময়ত ৰাজ্যপাল মুখীয়ে জিলাখনৰ সকলো স্তৰৰে লোকৰ মাজলৈ কেনেদৰে কল্যাণকামী আঁচনি সমূহ লৈ যাব পাৰি সেই সম্পৰ্কত বিভিন্ন সামাজিক সংগঠনৰ প্ৰতিনিধি আৰু সংবাদকৰ্মীসকলৰ লগত এক মত বিনিময় অনুষ্ঠান সম্বোধন কৰে।

ইফালে জিলা আৱৰ্ত ভৱনৰ সভা গৃহত জিলাৰ আৰক্ষী অধীক্ষকৰ সৈতে আইন-শৃংখলা সম্পৰ্কতো আলোচনাত অংশ লয় ৰাজ্যপাল জগদীশ মুখী।