বান- খহনীয়াৰ স্থায়ী সমাধানৰ দাবীত বালিপৰাত আছু, অসম সেনাৰ ৰাজহুৱা মুণ্ডন

শোণিতপুৰৰ  বালিপৰা  অঞ্চলৰ ৰাইজক দীৰ্ঘদিন ধৰি জুৰুলা কৰি ৰখা বানপানী, গৰাখহনীয়া সমস্যাৰ স্থায়ী সমাধানৰ দাবীত আজি বালিপৰাত আছু, অসম সেনা আৰু ৰঙাপৰা আঞ্চলিক উন্নতি সভাৰ উদ্যোগত ৰাজহুৱা মুণ্ডন কাৰ্যসূচী ৰূপায়ণ কৰা হয়।

বালিপৰাত জৰাসৰ, মানশিৰি নৈয়ে প্ৰতিবছৰে বান, গৰাখহনীয়াৰে ৰাইজৰ ধন -জনৰ বিস্তৰ ক্ষতি সাধন কৰি  অহাৰ পিছতো স্থানীয় বিধায়ক পল্লৱলোচন দাসে সমস্যাটোৰ প্ৰতি কোনো কাণসাৰ নিদিয়াৰ অভিযোগ কৰি কালিৰে পৰা  দল- সংগঠনসমূহে একত্রিতভাৱে উক্ত সমস্যাসমূহ  শীঘ্ৰে সমাধান কৰাৰ দাবীৰে এনেদৰে ২৪ ঘন্টীয়া অনশনৰ অন্তত আজি সমূহীয়াকৈ মুণ্ডন কৰি প্ৰতিবাদ  কৰে।

তদুপৰি সন্থাই ইতিমধ্যে উক্ত সমস্যা সমাধানৰ বাবে ইতিপূৰ্বে  আৱণ্টিত পুঁজিৰ ক্ষেত্ৰতো বিয়াগোম কেলেংকাৰী সংঘটিত হোৱা বুলি অভিযোগ উত্থাপন কৰে। যাৰ ফলত স্বাধীনতাৰ ৭০ বছৰৰ পিছতো বালিপৰাবাসীয়ে উক্ত সমস্যাৰ সন্মুখীন হৈ আহিবলগীয়া হৈছে বুলিও ক্ষোভ উজাৰে প্ৰতিবাদকাৰীসকলে।

প্ৰতিবাদকাৰীসকলে শীঘ্ৰে উক্ত জ্বলন্ত সমস্যাৰ সমাধান নকৰিলে অনাগত দিনত জংগী আন্দোলন কৰা হ’ব বুলিও হুংকাৰ দিয়ে।

উল্লেখযোগ্য যে দীৰ্ঘদিন ধৰি অঞ্চলটোৰ ৰাইজে এনে সমস্যাৰ সন্মুখীন হৈ আহিছে যদিও কোনো এখন চৰকাৰে ইয়াৰ প্ৰতি গুৰুত্ব নিদিয়াৰ অভিযোগ উত্থাপন কৰিছে ৰাইজে।