বিজেপিৰ জনসম্পৰ্ক কাৰ্যসূচীৰ পাতনি মেলিলে ত্ৰিপুৰাৰ মুখ্য মন্ত্ৰী বিপ্লব দেৱে

দেশজুৰি বিজেপিয়ে আৰম্ভ কৰা জনসম্পৰ্ক অভিযানৰ অংশ স্বৰূপে দেওবাৰে ত্ৰিপুৰাৰ মুখ্য মন্ত্ৰী বিপ্লব কুমাৰ দেবে আগৰতলা পৌৰ নিগমৰ মেয়ৰ ড০ প্ৰফুল্লজিৎ সিনহা আৰু ৰাজ্যখনৰ প্ৰতিভাধৰ কিকবক্সাৰ তথা ৰাছিয়াত অনুষ্ঠিত বিশ্ব কিক বক্সিং চেম্পিয়নশ্বিপত সোণৰ পদক দখল কৰা নিতিশা চক্ৰৱৰ্তীক সাক্ষাৎ কৰে।

প্ৰধান মন্ত্ৰী নৰেন্দ্ৰ মোদী নেতৃত্বাধীন এনডিএ চৰকাৰখনে বিগত চাৰিটা বছৰত পোৱা বিভিন্ন সাফল্য তথা অনাগত দিনত কেনেধৰণৰ পদক্ষেপ গ্ৰহণ কৰিব সেই সম্পৰ্কে বিশিষ্ট বুদ্ধিজীৱি, চিন্তাবিদ আদিৰ লগত আলোচনা কৰি তেওঁলোকৰ উপদেশ সমূহ গ্ৰহণ কৰাৰ বাবেই সমগ্ৰ দেশতে বিজেপিয়ে এই অভিযান আৰম্ভ কৰিছে।

মুখ্য মন্ত্ৰী দেবে প্ৰথমতে মেয়ৰৰ ঘৰলৈ যায়। আৰু তাত মুখ্য মন্ত্ৰীগৰাকীয়ে বিজেপি নেতৃত্বাধীন কেন্দ্ৰীয় চৰকাৰৰ সফলতাসমূহৰ বিষয়ে আলোচনা কৰে। বিজেপি চৰকাৰৰ সাফল্যসমূহৰ বিষয়ে উল্লেখ থকা বুকলেট এখনো মেয়ৰ সিনহাক প্ৰদান কৰে।

সিনহাক সাক্ষাৎ কৰাৰ পাছতে মুখ্য মন্ত্ৰী দেৱে নিতিশাৰ ঘৰলৈ যায়। বিজেপিৰ সফলতাৰ বিষয়ে নিতিশাৰ লগতে তেওঁৰ পৰিয়ালৰ আন আন সদস্যসকলৰ সৈতে মত বিনিময় কৰা দেখা যায়।

বিজেপিৰ ৰাষ্ট্ৰীয় অধ্যক্ষ অমিত শ্বাহে এই অভিযান সম্পৰ্কে উল্লেখ কৰি কয় যে বিজেপি নেতৃত্বাধীন কেন্দ্ৰীয় চৰকাৰখনে বিগত চাৰিবছৰত ভাৰতৰ কি পৰিৱৰ্তন কৰিলে বা কিমান উন্নয়ন হ’ল আদি বিষয় জনসাধাৰণক অৱগত কৰোৱাৰ বাবে সমগ্ৰ দেশতে এনেধৰণৰ অভিযান আৰম্ভ কৰিছে।

উল্লেখ্য যে মুখ্য মন্ত্ৰী বিপ্লব দেৱে ওপৰোক্ত ব্যক্তি দুজনৰ উপৰি ৰাজ্যখনৰ বিভিন্ন বিশিষ্ট ব্যক্তিসমূহকো সাক্ষাৎ কৰি চৰকাৰৰ কাম-কাজক লৈ আলোচনা তথা পৰামৰ্শ গ্ৰহণ কৰে।