বিজেপিৰ লগত মিত্ৰতা কৰাৰ লক্ষ্যৰে নতুন দিল্লীলৈ ৰাওনা আই পি এফ টিৰ প্ৰতিনিধি দল

ত্ৰিপুৰা বিধানসভা নিৰ্বাচনৰ দিন চমু চাপি অহাৰ লগে লগে বিভিন্ন দলৰ মাজত প্ৰাক নিৰ্বাচনী মিত্ৰতা সম্পন্ন কৰি নিৰ্বাচনী বৈতৰণী পাৰ হ’বলৈ চিন্তা চৰ্চা অব্যাহত ৰাখিছে। মিত্ৰতা সম্পৰ্কে বিভিন্ন দলৰ মাজত আলোচনা কৰি থকা সময়তে ইণ্ডিজিনিয়াছ পিপ’লছ ফ্ৰন্ট অৱ ত্ৰিপুৰাৰ অধ্যক্ষ এন ছি দেৱবৰ্মা সহিতে এটা প্ৰতিনিধি দলে সোমবাৰে বিজেপিৰ লগত মিত্ৰতা সম্পৰ্কে আলোচনা কৰিবলৈ নতুন দিল্লীলৈ ৰাওনা হয়।

আই পি এফ টিৰ প্ৰতিনিধিৰ দলটোৱে নতুন দিল্লীত ড’নাৰ মন্ত্ৰী জীতেন্দ্ৰ সিঙ, ভাৰতীয় জনতা পাৰ্টীৰ ৰাষ্ট্ৰীয় সাধাৰণ সম্পাদক ৰাম মাধৱ আৰু ত্ৰিপুৰা নিৰ্বাচনৰ দায়িত্বত থকা হিমন্ত বিশ্ব শৰ্মাৰ লগত মিত্ৰতা সম্পৰ্কে আলোচনা কৰিব। ত্ৰিপুৰা নিৰ্বাচনত মানিক সৰকাৰ নেতৃত্বাধীন চি পি আই এম দলক ওফৰাবলৈ বাওপন্থী বিৰোধী দল অৰ্থাৎ ৰাশ্ট্ৰীয় ৰাজনৈতিক দলৰ লগতহে মিত্ৰতা কৰিব বুলি আই পি এফ টিৰ নেতা তথা অধ্যক্ষই সংবাদ মাধ্যমৰ আগত জানিবলৈ দিয়ে।

‘বিজেপিৰ ওপৰত নিৰ্ধাৰণ কৰিব মিত্ৰতাৰ ভৱিষৎত। আমাৰ মুখ্য দাবী হ’ল তিপ্ৰালেণ্ড। খিলঞ্জীয়া লোকসকলৰ বাবে পৃঠক ৰাজ্য গঠন কৰি দিয়াৰ বাবে যদিহে বিজেপিয়ে আশ্বাস প্ৰদান কৰে তেন্তে মিত্ৰতা সম্ভৱ হৈ উঠিব পাৰে’। এই মন্তব্য কৰে অধ্যক্ষ এন ছি দেৱবৰ্মাই।