বিদেশীৰ নাম এন আৰ চিৰ খচৰাত সোমালেও মূল এন আৰ চিত সেয়া বাদ পৰিব : হাজেলা

বিদেশীৰো নাম এন আৰ চিৰ চূড়ান্ত খচৰাত সোমাইছে বুলি হৈ-চৈ চলি থকাৰ মাজতে এন আৰ চিৰ ৰাজ্যিক সমন্বয়ক প্ৰতীক হাজেলাই এই বিষয়টোত গুৰুত্বপূৰ্ণ ভাষ্য আগ বঢ়াইছে সংবাদ মধ্যমৰ আগত।

হাজেলাই জানিবলৈ দিছে যে বিদেশীৰ যদি ক’ৰবাত নাম সোমাইছে সেয়া দুটা কাৰণত হ’ব পাৰে। প্ৰথম সাম্ভাব্য কাৰণটো হ’ল- এন আৰ চিৰ আৱেদন দাখিলৰ সময়ত এইসকলৰ বিৰুদ্ধে বিদেশী ন্যায়াধিকৰণৰ গোচৰ নাছিল, পৰৱৰ্তী সময়তহে গোচৰ ৰুজু হৈছিল। দ্বিতীয়টো সম্ভাব্য কাৰণ হ’ল- এন আৰ চি কৰ্তৃপক্ষক এইসকল লোকে মিছা তথ্য দি নাম অন্তৰ্ভুক্ত কৰিবলৈ কিবা প্ৰকাৰে সক্ষম হৈছে।

এই দুটা সম্ভাৱনা আগ বঢ়াই ৰাজ্যিক সমন্বয়কজনে তাৎপৰ্য্যপূৰ্ণ মন্তব্য কৰে এইবুলি যে যি কাৰণেই নহওক সকলোবোৰ দিশ পৰ্যালোচনা কৰা হ’ব আৰু চূড়ান্ত তালিকাৰ পৰা তেনে লোকৰ নাম বাদ পৰিব।

আনহাতে বহিঃৰাজ্যলৈ প্ৰেৰণ কৰা নথিৰ সংখ্যা সন্দৰ্ভত কয় যে কোন ৰাজ্যলৈ কিমান নথি প্ৰেৰণ কৰা হৈছিল সেয়া জনাব পৰা নাযায় যদিও প্ৰায় ৬ লাখ নথি প্ৰেৰণ কৰা হৈছিল বুলি কয়। ইয়াৰে ৫০ শতাংশ নথিৰ পৰীক্ষণ সম্ভৱ হৈছে বুলি জানিবলৈ দিয়ে।

উল্লেখযোগ্য যে ৩০ জুলাইত এন আৰ চিৰ চূড়ান্ত খচৰা প্ৰকাশ কৰাৰ পিছতে কিছুমান অঞ্চলত বিদেশী ন্যায়াধিকৰণে বিদেশী ঘোষণা কৰা লোকৰো নাম এই খচৰাত পোৱা গৈছে বুলি অভিযোগ আহিছে। বিশেষকৈ মৰিগাওঁ জিলাত ৩৯টা তেনেকুৱা পৰিয়ালৰ নাম খচৰাত আছে বুলি খবৰ ওলাইছে।