বিদ্যালয়ৰ শিক্ষয়িত্ৰী তথা ছাত্ৰ নেতাক গ্ৰেপ্তাৰৰ প্ৰতিবাদত ৰঙিয়াত ৩১নং ৰাষ্ট্ৰীয় ঘাইপথ অৱৰোধ
ৰঙিয়া ৰেডহৰ্ন পাব্লিক স্কুলৰ পাঁচগৰাকী শিক্ষয়িত্ৰীৰ লগতে এজন ছাত্ৰ নেতাক আটক কৰাৰ প্ৰতিবাদত আজি বৃহৎ সংখ্যক ৰাইজে ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে। আজি পুৱাৰ ভাগত বৃহৎ সংখ্যক লোকে ৰঙিয়া ৰেডহৰ্ন পাব্লিক স্কুলৰ সন্মুখৰে যোৱা ৩১ নং ৰাষ্ট্ৰীয় ঘাইপথটো অৱৰোধ কৰে। উত্তাল প্ৰতিবাদ তথা অৱৰোধ কাৰ্যসূচী চলি থকা সময়তে ৰঙিয়া মহকুমাধিপতি মুনীন্দ্ৰ বৰদলৈ, ৰঙিয়া ৰাজহ চক্ৰ বিষয়া এমিলী বৰুৱা, মহকুমা আৰক্ষী বিষয়া প্ৰনৱ কুমাৰ পেগু উপস্থিত হৈ প্ৰতিবাদকাৰী সকলক আলোচনাৰ মাধ্যমেৰে বুজাবলৈ চেষ্টা কৰে। কিন্তু প্ৰতিবাদকাৰী সকলে কামৰূপ উপাযুক্তৰ উপস্থিতিৰ দাবী জনাই প্ৰতিবাদ অব্যাহত ৰাখে।
ভোগালী বিহু লৈ মাথোঁ এটা দিন বাকী থকা অৱস্থাত কেইবা ঘণ্টা এই ৰাষ্ট্ৰীয় ঘাইপথটো বন্ধ হৈ পৰাত তীব্ৰ যান-জোঁটৰ সৃষ্টি হোৱাৰ লগতে সীমাহীন অসুবিধাত পৰে দূৰদূৰণিৰ যাত্ৰীসকলে ।
‘ৰঙিয়া ৰেডহৰ্ন পাব্লিক স্কুল’ সেনা কৰ্তৃপক্ষই বন্ধ কৰি দি স্কুলখনত সেনাই বাহৰ পতা কাৰ্যক লৈ ৪ জানুৱাৰিত বিদ্যালয়খনৰ শিক্ষক-শিক্ষয়িত্ৰী তথা অভিভাৱকসকলে অতিষ্ঠ হৈ সেনাৰ আচবাব সমূহ দলিওৱাৰ লগতে ভাঙি লণ্ড ভণ্ড কৰি দিয়ে। ইয়াৰ পিছতে সেনাই ৰঙিয়া আৰক্ষী থানাত এক গোচৰ ৰুজু কৰে।
আৰক্ষীযে সেনাৰ এজাহাৰৰ ভিত্তিত বৃহস্পতিবাৰে গৰিয়া জনগোষ্ঠীৰ ছাত্ৰ নেতা মতিউৰ ৰহমান, শিক্ষয়িত্ৰী প্ৰমীলা দাস, পম্পী দেৱী, জোৎস্না দেৱী, মনিকংকনা দাস, নমিতা দাসক গ্ৰেপ্তাৰ কৰি জেল হাজোতলৈ প্ৰেৰণ কৰে৷
স্মৰ্তব্য যে, ৰঙিয়াৰ চেপ্তিৰ সেনা ছাউনীত যোৱা প্ৰায় ৩৭ বছৰ ধৰি বিদ্যালয়খন চলি আছিল যদিও সেনা কৰ্তৃপক্ষই যোৱা দুবছৰ ধৰি কোনো অজ্ঞাত কাৰণত বিদ্যালয়খন বন্ধ কৰি দিয়াৰ চেষ্টা অব্যাহত ৰাখিছে।