বিশিষ্ট চিত্র সাংবাদিক ৰেজেক আলী আহমেদৰ পৰলোক প্ৰাপ্তি
অসমৰ বিশিষ্ট চিত্ৰ সাংবাদিক তথা ‘অসমীয়া খবৰ’ কাকতৰ জ্যেষ্ঠ উপ-সম্পাদক ৰেজেক আলী আহমেদৰ যোৱা নিশা দেহাৱসান ঘটে। সুদীৰ্ঘ কাল ৰাজ্যখনৰ সংবাদ-সাংস্কৃতিক জগতখনৰ সৈতে জড়িত আহমেদ বিগত চল্লিছ দিন ধৰি গুৱাহাটী মহানগৰীৰ হায়াত হস্পিতালত চিকিৎসাধীন হৈ আছিল। দেওবাৰে সন্ধিয়া প্ৰায় ৭.৩০ বজাত তেওঁৰ জন্ম গাঁও মঙলদৈৰ সমীপৰ বৰদৌলগুৰিৰ ঘৰলৈ নিয়া হয় যদিও প্ৰায় ৮.৩০ বজাত তেওঁ শেষ নিশ্বাস ত্যাগ কৰে।
বৰদৌলগুৰিৰ প্ৰয়াত নজিৰউদ্দিন আহমেদ আৰু আজিমুন নেছাৰ পুত্ৰ ৰেজেক আলী আহমেদৰ মৃত্যুৰ সময়ত বয়স হৈছিল ৫৪ বছৰ। গুৱাহাটীৰ বি বৰুৱা মহাবিদ্যালয়ৰ পৰা স্নাতক ডিগ্ৰী লাভ কৰা আহমেদে অসম বিত্তীয় নিগমত প্ৰায় আঢ়ৈ বছৰ চাকৰি কৰাৰ পাছত কেইবাখনো সংবাদপত্ৰৰ সৈতে জড়িত হৈ হৈছিল।
হৃদৰোগৰ লগতে একাধিক ৰোগত আক্ৰান্ত হৈ মৃত্যুক সাবটি লোৱা আহমেদ বিশেষকৈ এগৰাকী চিত্ৰ সাংবাদিক হিচাপে পৰিচিত আছিল। জ্যেষ্ঠ সাংবাদিকগৰাকীয়ে তিনিজন ভাতৃ, ছয়গৰাকী ভগ্নীৰ লগতে পত্নী আৰু একমাত্ৰ কন্যাক ইহ সংসাৰত এৰি থৈ যায়।
উল্লেখ্য যে, আজি পুৱা ৯.৩০ বজাত বৰদৌলগুৰিত জানাজা সম্পন্ন কৰা হয় ৰেজেক আলী আহমেদৰ। তেওঁৰ অকাল মৃত্যুৱে অসমৰ সাংস্কৃতিক জগতখনত এক গভীৰ শোকৰ ছাঁ পেলাইছে। কৰ্মজীৱনৰ অধিকাংশ সময় ৰাজ্যখনৰ সাংস্কৃতিক জগতখনৰ সৈতে নিবিড়ভাৱে জড়িত থকা জ্যেষ্ঠ সাংবাদিকগৰাকীৰ মৃত্যুত ব্যথিত হৈ পৰিছে সাংস্কৃতিক মহল।